Grímumaðurinn grunaður um skelfilega árás í Kópavogi gengur enn laus

Rannsókn lögreglu á hnífstunguárásina í húsakynnum Greiningar- og ráðgjafastöðvar ríkisins við Digranesveg í Kópavogi mánudaginn 19. desember síðastliðinn hefur engu skilað. Þar var kona sem starfa hjá Greiningarstöðinni stungin af manni sem huldi andlit sitt með svokallaðri „Scream“-grímu, sem var gerð ódauðleg í samnefndum hryllingsmyndum.

Lögreglan leitar enn mannsins sem skildi grímuna og hnífinn eftir í stigagangi þar sem Greiningarstöðin er til húsa. Unnið er að því að greina lífsýni á grímunni og hnífnum en þeirri greiningu er ekki lokið að sögn Gríms Grímssonar, yfirlögregluþjóns á höfuðborgarsvæðinu.

Hann vildi ekki staðfesta hvort einhver fingraför hefðu fundist á hnífnum eða grímunni. Hann tók jafnframt fram að þó svo að slíkt myndi finnast þá þarf hins vegar að finna samsvörum í grunni um lífefni og fingraför. Þessi greiningarvinna tekur langan tíma og ekki ljóst hvort hægt sé að para lífsýni sem mögulega finnast á hnífnum eða grímunni við það sem fyrir er í gagnagrunnum.

Einn var handtekinn samdægurs og árásin átti sér stað en hann var látinn laus að lokinni yfirheyrslu. Lögreglan hefur engan nálgast vegna málsins síðan þá að sögn Gríms. Konan og maðurinn áttu engin samskipti og engar öryggismyndavélar voru á svæðinu, og því hefur reynst erfitt að hafa uppi á manninum.

Konan slasaðist ekki alvarlega í árásinni en hlaut skurð á handlegg. Grímur segir hana skiljanlega skelkaða eftir árásina en vildi ekki fara út í hvort hún nyti einhverskonar verndar af hálfu lögreglu.