Ýmsir hugsi yfir úthringingum forystunnar í flokksráðsmenn

Nokkurs titrings gætir í flokksráði Vinstri grænna, sem samþykkja þarf málefnasamning væntanlegrar ríkisstjórnar í samræmi við lög flokksins. Fréttablaðið ræddi við nokkra flokksráðsmenn um viðræðurnar og andrúmsloftið í flokknum.

Mjög skiptar skoðanir eru meðal flokksmanna um stjórnarmyndunarviðræðurnar. Margir eru vonsviknir; treysta forystunni fullkomlega en skilja ekki þetta skref.

Þá hafa fulltrúar í flokksráðinu tekið úthringingum frá þingmönnum, fyrrverandi ráðherrum og öðru forystufólki í Vinstri grænum með misjöfnum hætti og nokkrir fundið fyrir þrýstingi. Aðrir segjast ekki hafa upplifað símtöl forystunnar sem þrýsting heldur talið að menn vildu aðeins ræða við baklandið, heyra afstöðu manna og taka stöðuna.

Yfir hundrað manns eiga sæti í flokksráði Vinstri grænna. Í ráðinu eiga sæti þingmenn flokksins og fulltrúar hans í sveitarstjórnum um allt land, auk fulltrúa aðildarfélaga og svæðafélaga. Þá eru fjörutíu fulltrúar í ráðinu kosnir á landsfundi flokksins.

Viðhorf innan flokksins til samstarfs við Sjálfstæðisflokkinn hafa þó lengi verið blendin eins og skoðanakannanir bæði fyrir og eftir nýafstaðnar kosningar hafa sýnt.

„Stór hluti ungliðahreyfingarinnar er mótfallinn samstarfi við þessa flokka,“ segir Gyða Dröfn Hjaltadóttir, formaður UVG. Hún segist þó ekki vita til þess að einhverjir hafi sagt sig úr hreyfingunni. „En ég veit um einhverja sem vilja segja sig úr VG en vera áfram í UVG, enda er UVG sjálfstæð hreyfing.“ Gyða segir þó ákveðinn vanda fylgja því. „Þá erum við komin í þann vanda að geta ekki haft jafn mikil áhrif innan móðurhreyfingarinnar enda værum við þá að kúpla okkur út úr innra starfinu að einhverju leyti, segir Gyða og bætir við; „Við þurfum svolítið að bíða og sjá hvað verður. Við vitum ekki hvernig samningurinn verður, hvort hann verður samþykktur og hvort flokkurinn fer yfirhöfuð í ríkisstjórn.“

Auk flokksmanna úr ungliðahreyfingunni, sem eru hvað neikvæðastir um stjórnarsamstarfið, er töluverð andstaða úr hópi elstu félagsmanna flokksins. Flokksmenn af höfuðborgarsvæðinu eru einnig frekar neikvæðari en landsbyggðarfólk flokksins og samkvæmt heimildum Fréttablaðsins veldur það nokkrum áhyggjum að stuðningur við stjórnarsamstarfið sé mestur meðal þeirra sem eru síst líklegir til að skila sér til Reykjavíkur á flokksráðsfund.

Flokksráðið er þríklofið í afstöðu sinni til viðræðna flokksins. Sumir eru mjög jákvæðir fyrir stjórnarsamstarfi en aðrir eru þvert á móti og vilja undir engum kringumstæðum að flokkurinn fari í ríkisstjórn með Sjálfstæðisflokknum. Þá eru þeir sem eru efins um samstarf en vilja þó bíða og sjá hvað kemur út úr viðræðum. Af samtölum Fréttablaðsins við flokksráðsmenn eru margir í síðast talda hópnum. Flestir viðmælenda blaðsins telja þó að málefnasamningur verði samþykktur ef til þess kemur að samningar náist meðal flokkanna.