Duterte segir spilafíkil hafa staðið fyrir ódæðinu

Rodrigo Duterte, forseti Filippseyja, segir að mjög skuldugur spilafíkill hafi borið ábyrgð á árásinni í spilavítinu í höfuðborginni Manila fyrr í vikunni þar sem um fjörutíu manns létu lífið.

„Hann missti allt sem hann átti og missti svo vitið,“ segir Duterte.

Hryðjuverkasamtökin ISIS höfðu áður lýst yfir ábyrgð á ódæðnu. Lögreglustjórinn Oscar Albayalde leggur þó einnig áherslu á að spilafíkillinn, sem var þriggja barna faðir, hafi staðið fyrir ódæðinu. „Við endurtökum að þetta var ekki hryðjuverk,“ sagði Albayalde á fréttamannafundi.

Í frétt New York Times segir að árásarmaðurinn, hinn 42 ára Jessie Carlos, hafi verið fyrrverandi starfsmaður filippseyska fjármálaráðuneytisins. Hafi honum í apríl, að ósk fjölskyldu sinnar, verið bannað að stíga fæti í spilavíti vegna fíknar sinnar.

Maðurinn skaut á fólk í spilavítinu áður en hann kveikti þar eld. Flest fórnarlömbin létust af völdum köfnunar vegna mikils reyks sem myndaðist í spilavítinu.