Fleiri telja að aðstæður í atvinnulífinu muni versna

Stjórnendur 400 stærstu fyrirtækja landsins telja aðstæður í atvinnulífinu hér á landi vera góðar. Þeir telja þó að þær muni versna á næstunni. Þá hefur skortur á starfsfólki dregist saman og segjast þrír af hverjum tíu stjórnendum nú finna fyrir vinnuaflsskorti.

Þá kemur fram í niðurstöðum nýrrar könnunar Gallup að búast megi við 1,5 prósenta fjölgun starfsmanna á almennum vinnumarkaði á næstu sex mánuðum. Það samsvarar um tvö þúsund störfum.

Á vef Samtaka atvinnulífsins kemur fram að vísitala efnahagslífsins, sem endurspegli mun á fjölda stjórnenda sem meti aðstæður góðar og slæmar, sé enn mjög há.



„Þrír af hverjum fjórum stjórnendum telja aðstæður góðar í atvinnulífinu, en einungis 3% að þær séu slæmar. Litlu munar á mati stjórnenda fyrirtækja í alþjóðlegri samkeppni og annarra atvinnugreina þar sem 71% þeirra fyrrnefndu telja aðstæður góðar en 77% hinna síðarnefndu,“ segir á vefnum.

Þó flestir stjórnendur telji að aðstæður í atvinnulífinu verði svipaðar eftir sex mánuði, fer þeim fjölgandi sem telja að aðstæður muni versna. 65 prósent telja að aðstæður verði óbreyttar, ellefu prósent telja að þær muni batna og 24 prósent segja að þær muni versna.

Á vef SA segir að um margra ára skeið hafi fleiri talið að aðstæður muni batna en ekki versna. Það hefur nú breyst að undanförnu.

Þegar kemur að skorti á starfsfólki er hann minni en hann hefur verið síðustu tvö ár. Aðeins 30 prósent stjórnenda telja fyrirtæki þeirra búa við slíkan skort. Það hlutfall hefur verið um 40 prósent í ár og í fyrra.

Skorturinn er minnstur í sjávarútvegi og verslun, eða um 15 prósent. Hann er hins vegar mestur í flutningum, ferðaþjónustu og byggingarfjármálastarfsemi, eða 35 til 50 prósent.