Guðmundur vann stórsigur á Degi

Lið þeirra Guðmundar Guðmundssonar og Dags Sigurðssonar, Barein og Japan, áttust við í vináttulandsleik í dag.

Barein var miklu sterkari aðilinn og vann 15 marka sigur, 37-22. Staðan í hálfleik var 19-10, Barein í vil.

Bæði þessi lið spiluðu einnig vináttulandsleiki í gær. Barein tapaði þá fyrir Póllandi, 26-18, og Japan laut í lægra haldi fyrir Hvíta-Rússlandi, 31-27.

Guðmundur og Dagur eru báðir að undirbúa lið sín fyrir Asíuleikana í næsta mánuði. Barein er í riðli með Óman, Úsbekistan og Ástralíu á meðan Japan er í riðli með Íran og Írak.

Dagur og lærisveinar hans mæta íslenska landsliðinu í vináttulandsleik í Laugardalshöll 3. janúar.

BahrainJapan pic.twitter.com/iV5am7vrlw

— Dagur Sigurdsson (@DagurSigurdsson) December 28, 2017