Grunaður um tilraun til manndráps: Kona tekin hengingartaki þar til hún missti meðvitund

Tuttugu og tveggja ára gamall karlmaður situr nú í gæsluvarðhaldi til föstudagsins 15. desember, grunaður um alvarlegt heimilisofbeldi gegn 27 ára gamalli konu.

Greint er frá málinu á vef Ríkisútvarpsins en þar segir að lögreglan rannsaki málið sem tilraun til manndráps. Maðurinn er sakaður um að hafa tekið konuna hengingartaki þar til hún missti meðvitund.

Ríkisútvarpið segir þetta hafa gerst í Holtunum í Reykjavík aðfaranótt sunnudags. Konan er sögð hafa borið við að hún viti ekki hversu lengi hún hafi verið meðvitundarlaus, en það hafi verið þó nokkur tími. Hún hafi komist aftur til meðvitundar klukkan fimm á sunnudagsmorgun og hlaupið þá í mikilli geðshræringu út úr húsinu og gert nærstöddum viðvart sem höfðu samband við lögreglu.

Ríkisútvarpið segir áverka á konunni hafa verið talsverða eftir henginguna og hafi tennur hennar meðal annars brotnað.

Guðmundur Páll Jónsson, lögreglufulltrúi á höfuðborgarsvæðinu, segir í samtali við Vísi að játning liggi ekki fyrir hjá manninum en Guðmundur segir ekki tímabært að gefa út hvort maðurinn neiti sök.

Á vef Ríkisútvarpsins kemur fram að maðurinn eigi annað ofbeldismál á skrá hjá lögreglu gegn þessari sömu konu. Guðmundur Páll segir það mál ekkert ósvipað og því sem átti sér stað um liðna helgi.

„En kannski ekki eins svívirðileg árás og þessi um helgina,“ segir Guðmundur sem sagði við RÚV að það væri ekki manninum að þakka að konan lifði af.