Hringvegurinn lengist um tíu kílómetra í nótt

Hringvegurinn lengist á miðnætti um tíu kílómetra en á sama tíma styttast malarkaflar hans um 24 kílómetra, allt vegna númerabreytingar á Austurlandi. Fjallað var breytinguna í frétt Stöðvar 2, sem sjá má hér að ofan. 

Lengsti malarkafli hringvegarins, 24 kílómetra langur, liggur um Breiðdal og Breiðdalsheiði á Austfjörðum. En á miðnætti hættir þessi kafli að vera hluti hringvegarins, sem allt frá því hann opnaðist árið 1974 hefur verið ókrýndur konungur íslenskra þjóðvega, enda með númerið eitt. 

Það er nefnilega verið að færa hringveginn á kaflanum milli Egilsstaða og Breiðdalsvíkur. Frá og með morgundeginum mun hann liggja um Reyðarfjörð, Fáskrúðsfjörð og Stöðvarfjörð, í stað Breiðdalsheiðar.

Það er í raun ekki verið að breyta neinu nema vegnúmerum, sem þó kostar milli átta og tólf milljónir króna. Breytingunni er samt ætlað að beina ferðamönnum, sem aka eftir vegnúmerum, frá því að leggja á Breiðdalsheiði að vetrarlagi, og er þannig líkleg til þess að auka ferðamannaumferð í gegnum þorpin á fjörðunum. Hringvegurinn lengist við þetta um tæpa tíu kílómetra, og verður 1341 kílómetri, samkvæmt upplýsingum Vegagerðarinnar. 

Og við það að strika yfir Breiðdalsheiðina styttast malarkaflar hringvegarins úr 32 kílómetrum niður í átta. Malbikshlutfallið á þjóðvegi númer eitt hækkar við þetta úr 97,6 prósentum upp í 99,4 prósent.

Stærstu tíðindi morgundagsins í vegamálum Austfirðinga eru hins vegar opnun Norðfjarðarganga en vegna þeirra verða hátíðahöld alla helgina í Fjarðabyggð.