Lamborghini Urus kynntur í næsta mánuði

Lengi hefur verið beðið eftir ofurjeppanum Lamborghini Urus og fimm og hálft ár síðan fyrirtækið tilkynnti um áætlun sína að smíða jeppann. Nú er sú bið brátt á enda því hann verður sýndur almenningi þann 4. desember, eða eftir aðeins 3 vikur. Lamborghini Urus er enginn venjulegur jeppi því undir húddi hans er 650 hestafla 4,0 lítra V8 vél og slær hann því við í hestöflum öðrum nýlegum ofurjeppa, þ.e. Bentley Bentayga með sín 600 hestöfl.

Lamborghini ætlar Urus stórt hlutverk hjá fyrirtækinu því gert er ráð fyrir því að framleiðsla Urus muni tvöfalda sölu Lamborghini bíla og í því augnamiði hefur fyrirtækið fjölgað starfsmönnum um 700 í Sant´Agata verksmiðju Lamborghini í Bologna. Líklega eru þessar söluáætlanir ekki ofurbjartsýnar því svo virðist sem mikill markaður sé fyrir rándýra ofurjeppa og þau bílafyrirtæki sem hafa komið fram með slíka bíla á síðustu misserum hefur gengið vel að selja þá.

Lamborghini Urus er byggður á sama MLB Evo undirvagni og Porsche Cayenne, en bæði Lamborghini og Porsche tilheyra stóru Volkswagen bílasamstæðunni. Reyndar heyrir Lamborghini beint undir Audi sem er einnig undir regnhlíf Volkswagen.