FBI bendlaði Martin Luther King við kommúnisma og framhjáhöld

Skýrsla bandarísku alríkislögreglunnar FBI um blökkumannaleiðtogann Martin Luther King yngri eru á meðal skjala sem yfirvöld birtu í tengslum við morðið á John F. Kennedy á föstudag. Í henni er reynt að tengja King við kommúnista og ýjað að því að hann hefði haldið fram hjá konu sinni.

Í frétt CNN-fréttastöðvarinnar kemur fram að ekki sé ljóst hvort að höfundar skýrslu FBI hafi sannreynt upplýsingarnar sem koma fram í henni. Skýrslan var gerð á þeim tíma þegar King barðist sem harðast fyrir borgaralegum réttindum svartra í Bandaríkjunum og er hún sögð sýna hvernig FBI reyndi að grafa upp skaðlegar upplýsingar um hann.

Ekki er heldur ljóst hvers vegna skýrslan um King var á meðal gagna um morðið á Kennedy eða hvers vegna bandarísk yfirvöld héldu henni leyndri. Hluti af skjölunum um morðið hefur verið gerður opinber síðustu daga.

Á meðal efnis skýrslunnar, sem er dagsett aðeins þremur vikum áður en King var ráðinn af dögum í apríl 1968, eru ásakanir um að borgararéttindasamtökin Southern Christian Leadership Conference væru „leið fram hjá sköttum“. Þá eru margir félaga King sagðir hafa tengsl við kommúnisma.

J. Edgar Hoover, þáverandi forstjóri FBI, lét fulltrúa alríkislögreglunnar elta og njósna um King. Það var liður í gagnnjósnaherferð FBI sem CNN segir að hafi verið harðlega gagnrýnd og hafi leitt til mikilla breytinga á störfum alríkislögreglunnar síðar meir. FBI sendi King meðal annars nafnlausa sendingu með hljóðsnældum og bréfi þar sem hann var hvattur til að fremja sjálfsvíg.

Hoover réði ríkjum hjá FBI í hátt í fjörutíu ár, frá stofnun árið 1935 til 1972. Hann var meðal annars sagður hafa haldið skýrslur með viðkvæmum upplýsingum um forseta og aðra valdamenn í Bandaríkjunum.