Guðni boðar Katrínu á sinn fund

Guðni Th. Jóhannesson forseti hefur boðað Katrínu Jakobsdóttur, formann Vinstri grænna til fundar við sig á Bessastöðum í dag.

Þetta kemur fram í tilkynningu frá skrifstofu forseta. Má reikna með að Katrín muni þar greina forseta frá stöðu mála eftir tíðindi dagsins.

Greint var frá því skömmu eftir hádegi í dag að flokkarnir fjórir sem undanfarna daga hafa átt í formlegum stjórnarmyndunarviðræðum – það er Vinstri græn, Samfylkingin, Píratar og Framsóknarflokkurinn – hafi slitið viðræðunum.

Forsetinn veitti Katrínu umboð til myndunar nýrrar ríkisstjórnar síðastliðinn fimmtudag.