Ólafía með góðum vini og reynslubolta í ráshópi

Ólafía Þórunn Kristinsdóttir hefur leik á 10. holu á Evian Championship mótinu, síðasta risamóti ársins á LPGA-mótaröðinni. Ráshópur Ólafíu er meðal þeirra síðustu sem fara út í dag, klukkan 11.09.
Ólafía er að keppa á sínu þriðja risamóti en á enn eftir að komast í gegnum niðurskurð á risamóti. Hún keppti fyrr á þessu ári á KPMG PGA-meistaramóti kvenna og Opna breska.
Hún er í ráshópi með Angel Yin og Kim Kaufmann. Yin er nýliði, eins og Ólafía, og eru þær sagðar góðar vinkonur í umfjöllun á heimasíðu LPGA. Kaufman er reynsluboltinn í hópnum og er að spila á Evian Championship-mótinu í fjórða sinn.
Ólafía náði sínu fyrsta topp tíu móti um síðustu helgi er hún hafnaði fjórða sæti á móti í Indiana eftir að hafa leikið síðustu holuna á erni. Yin hefur þrívegis hafnað meðal tíu efstu á mótaröðinni til þessa.
Fylgst verður náið með gangi mála í beinni textalýsingu frá Vísi sem og á Golfstöðinni.
Bein útsending hófst í morgun klukkan 09.00 og stendur yfir til 12.00. Útsendingin hefst að nýju klukkan 13.30 og lýkur klukkan 16.30.
Þorsteinn Hallgrímsson, sérfræðingur Golfstöðvarinnar, er staddur í Frakklandi til að fylgjast með mótinu ásamt Friðriki Þór Halldórssyni myndatökumanni. Munu þeir flytja fréttir af Ólafíu á Golfstöðinni, í Sportpakkanum á Stöð 2 og á íþróttavef Vísis.
Tengdar fréttir

Ólafía: Völlurinn er ekkert lamb að leika sér við
Ólafía Þórunn Kristinsdóttir hefur leik á Evian Championship á morgun en þetta er síðasta risamót ársins. Mótið fer fram í Evian-les-Bains í Frakklandi.

Ólafía stekkur upp um 103 sæti á heimslistanum
Ólafía Þórunn Kristinsdóttir stökk upp um 103 sæti á heimslistanum í golfi sem var uppfærður í dag.

Gullörninn: Vippið sem færði Ólafíu 6,5 milljónir
Árangur Ólafíu Þórunnar Kristinsdóttur um helgina var gullsígildi, ekki bara vegna verðlaunafjárins.

Ólafía Þórunn: Reyndi að gera hlutina einfalt og halda mér í núinu
Ólafía Þórunn var þreytt en létt í lund er íþróttadeild 365 ræddi við hana er hún var nýlent í Frakklandi eftir að hafa lent í fjórða sæti á LPGA-móti í Indianapolis deginum áður.

Ólafía fékk rúmar 10 milljónir | Komin í 67. sæti peningalistans
Glæsilegur árangur Ólafíu Kristinsdóttur sem meira en tvöfaldaði verðlaunafé sitt á LPGA-mótaröðinni.