Golf

Ólafía stekkur upp um 103 sæti á heimslistanum

Ingvi Þór Sæmundsson skrifar
Ólafía Þórunn tók risastökk á heimslistanum í golfi.
Ólafía Þórunn tók risastökk á heimslistanum í golfi. vísir/getty
Ólafía Þórunn Kristinsdóttir stökk upp um 103 sæti á heimslistanum í golfi sem var uppfærður í dag.

Ólafía lenti í 4. sæti á Indy Women in Tech-mótinu í Indianapolis um helgina. Það er hennar besti árangur á LPGA-mótaröðinni og hann skilaði henni upp í 67. sæti peningalista mótaraðarinnar.

Ólafía var í 300. sæti á heimslistanum fyrir viku en er nú kominn upp í 197. sæti. Á einu ári hefur Ólafía farið úr 704. sæti í 197. sæti. Enginn Íslendingur hefur komist jafn ofarlega á heimslitanum í golfi.

Miðað við stöðuna á heimslistanum núna verður Ólafía á meðal þátttakanda á Ólympíuleikunum í Tókýó 2020, að því er fram kemur á golf.is.

Alls komast 120 kylfingar inn á Ólympíuleikana, 60 karlar og 60 konur. Notast er við kvótakerfi sem á að gera sem flestum þjóðum kleift að koma kylfingum á Ólympíuleikana.

„Fimmtán efstu á heimslista karla og kvenna komast sjálfkrafa inn á ÓL 2020 en aðeins fjórir geta verið frá sama landi á þeim lista. Kvóti er á fjölda keppenda frá hverri þjóð og geta aðeins tveir að hámarki verið frá sama landi í sætum 16-59 á styrkleikalistanum,“ segir í frétt golf.is.

Ólafía er núna stödd í Frakklandi þar sem hún keppir á Evian-meistaramótinu, síðasta risamóti ársins, seinna í þessari viku.

Heimslistann í golfi má sjá í heild sinni með því að smella hér.


Tengdar fréttir

Örn á lokaholunni skaut Ólafíu upp í þriðja sætið

Ólafía Þórunn Kristinsdóttir, kylfingur úr GR, kom í hús á fjórum höggum undir pari á hringnum og alls ellefu höggum undir pari á lokadegi Indy Women in Tech-mótsins í Indianapolis sem lauk rétt í þessu.

Ólafía Þórunn ein í fjórða sæti í Indianapolis

Ólafía Þórunn Kristinsdóttir, kylfingur úr GR, lauk leik í fjórða sæti á Indy Women in Tech-mótsins í Indianapolis sem lauk rétt í þessu með sigri Lexi Thompson en örn Ólafíu á lokaholunni kom henni úr tíunda sæti í það fjórða.




Fleiri fréttir

Sjá meira


×