Fólkið í Sjálfstæðisflokknum hefur rétt á því að velja

Undanfarna daga hafa birst í fjölmiðlum greinar þar sem tekist er á um hugmyndina um svokallað leiðtogaprófkjör í Sjálfstæðisflokknum í Reykjavík. Stjórn Varðar, fulltrúaráðs Sjálfstæðisfélaganna í Reykjavík samþykkti á fundi sínum 9. ágúst síðastliðinn að leggja þetta fyrirkomulag við val á lista fyrir fund fulltrúaráðsins sem haldinn verður seinna í dag.

Ekki voru allir mættir á fundinn enda ekkert sem benti til þess á fundinum að stjórnin ætlaði að fjalla um val á lista í byrjun ágúst þegar rúmir 9 mánuðir eru til kosninga og margir enn í sumarfrí. Engin dagskrá var send stjórnarmönnum né voru þeir upplýstir á annan hátt að til stæði að fjalla um þessi mál. Þrátt fyrir þessa augljósu annmarka á fundarsköpum ákvað formaður Varðar að afgreiða umræðu og atkvæðagreiðslu um leiðtogaprófkjör á einum og sama fundinum.

Undirritaðir stjórnarmenn voru meðal þeirra sem ekki sátu fundinn og brá skiljanlega illilega í brún þegar niðurstaða fundarins lá fyrir. Til að gefa öllum stjórnarmönnum tækifæri til að kynna sér tillöguna hafði þó verið ákveðinn fundur stuttu síðar. Því var hins vegar breytt með tölvupósti frá tillöguflytjendum þar sem stjórnarmenn voru hvattir til að hafna því að annar stjórnarfundur yrði haldinn.

Í kjölfar þessa komu nokkrir félagar í Verði á framfæri efasemdum um leiðtogaprófkjör í fjölmiðlum og vefmiðlum. Viðbrögð formanns Varðar voru þau að ráðast gegn þessum aðilum með því að skella fram á opinberum vettvangi fullyrðingum þar sem rekja mátti hvernig einstaka stjórnarmenn hefðu hagað málflutningi og atkvæðagreiðslu á umræddum stjórnarfundi Varðar. Háttsemi formanns Varðar var augljóst brot á trúnaði við þá stjórnarmenn fyrir utan að formaðurinn fór ekki með rétt mál í öllum tilvikum.

Það er öllum ljóst að ef leggja á fram tillögu með umfangsmiklum breytingum á kosningafyrirkomulagi þarf tíma til að vinna henni brautargengi og sátt um tillöguna meðal flokksmanna. Tillögunni fylgja margir óvissuþættir, eins og hún er lögð fram í dag, og því nauðsynlegt að skoða hana betur áður en endanleg ákvörðun er tekin í þessu mikilvæga máli. Það er sorglegt að verða vitni að þeim vinnubrögðum hluta stjórnar fulltrúaráðsins í Reykjavík sem hafa stuðlað að tortryggni og óþarfa átökum í aðdraganda prófkjörs sjálfstæðsmanna.

Höfundar eru félagar í stjórn Varðar, fulltrúaráðs Sjálfstæðisfélaganna.