Sjálfstæðismenn vilja halda mötuneytum eldri borgara opnum yfir sumartímann

Borgarfulltrúar Sjálfstæðisflokksins hafa lagt fram tillögu um að þjónusta mötuneyta við eldri borgara skerðist ekki yfir sumartímann. Fyrirhuguð skerðing hefst um næstu mánaðamót.

Alls eru sextán mötuneyti í borginni sem þjónusta eldri borgara en þjónusta í helmingi þeirra er skert yfir hásumarið. Var það gert til að mæta aðhaldskröfum.

Áslaug Friðriksdóttir, borgarfulltrúi Sjálfstæðisflokksins, talaði fyrir tillögunni á fundi borgarstjórnar í gær. Hún segir að þjónustan tryggi fjölbreytta og reglulega fæðu auk þess sem hún gegni afar mikilvægu félagslegu hlutverki fyrir þá sem nýta sér hana. Dæmi væru um að rask á rútínu hefði alvarlegar afleiðingar í för með sér.

„Mér finnst ástæða til þess þegar borgarsjóður stendur betur en áður að við hverfum frá skerðingu á grunnþjónustu. Þetta er grunnþjónusta sem eðlilegt er að halda úti allt árið um kring,“ sagði Áslaug á fundinum í gær.

Meirihlutinn telur eðlilegt að málið verði tekið fyrir á fundi velferðarráðs síðar í vikunni. Þá verði hægt að meta kostnað af tillögunni og hvort unnt sé að ráðast í verkið.

„Við höfum hér með tillögu um það að halda þessu opnu og munum taka afstöðu til þess,“ sagði Heiða Björg Hilmisdóttir, borgarfulltrúi Samfylkingarinnar. Rétt sé að meta tillöguna í nefnd í stað þess að taka ákvörðun strax.

„Á fundinum fáum upplýsingar um kostnað og getum metið hvort senda á beiðni til borgarráðs um þá fjármuni eða hvort þeir eru til hjá sviðinu,“ sagði Heiða Björg.