Embætti tollstjóra fyrst til að hljóta jafnlaunamerkið

Þorsteinn Víglundsson, félags- og jafnréttismálaráðherra, afhenti Snorra Olsen tollstjóra jafnlaunamerkið í dag. Embætti tollstjóra er fyrsta stofnunin sem hlýtur merkið en með merkinu sýna fyrirtæki fram á að innan þeirra viðgangist ekki kynbundin launamismunun.

Í fréttatilkynningu frá velferðarráðuneytinu segir að jafnlaunamerkinu sé ætlað að vera gæðastimpill og hluti af ímynd og orðspori fyrirtækja og stofnana. Merkið staðfestir að atvinnurekendur hafi komið sér upp ferli sem tryggir að málsmeðferð og ákvarðanir í launamálum feli hvorki í sér kynbundna mismunun eða mismunun af öðrum toga.

Alls tóku 11 stofnanir, tvö fyrirtæki og tvö sveitarfélög þátt í verkefninu. Embætti Tollstjóra er jafnframt fyrsta stofnunin sem öðlast vottunina en fast á hæla Tollstjóra koma nokkrar ríkisstofnanir og einkafyrirtæki sem eru annað hvort að ljúka innleiðingu eða í úttekt.

Fagna áfanganum

„Þetta er mjög stór dagur í  mínum huga og ástæða til að fagna þeim áfanga sem hér hefur náðst í baráttunni fyrir launajafnrétti kynja. Ég er sannfærður um að innleiðing jafnlaunavottunar verði þungt lóð á vogarskálar launajafnréttisins til lengri tíma litið,“ sagði Þorsteinn Víglundsson félags- og jafnréttismálaráðherra þegar hann afhenti Snorra Olsen jafnlaunamerkið í velferðarráðuneytinu í dag.

„Þótt innleiðing jafnlaunastaðalsins hjá embættinu hafi kostað tíma og fyrirhöfn hefur það verið vel þess virði. Þessi vinna hefur veitt okkur betri yfirsýn yfir launauppbygginguna, hún dregur fram hvað betur má fara og vottunin á eftir að hjálpa okkur við að laða að gott starfsfólk vegna þeirrar viðurkenningar sem hún felur í sér“ sagði Snorri Olsen tollstjóri þegar hann tók við jafnlaunamerkinu ásamt Unni Ýr Kristjánsdóttur, forstöðumanni mannauðsviðs embættisins.

Frumvarp um jafnlaunavottun umdeilt

Jafnlaunamerkið er hannað af Sæþóri Erni Ásmundssyni en hann vann samkeppni um hönnun þess sem haldin var á vegum aðgerðahóps um launajafnrétti og Hönnunarmiðstöðvar Íslands.

Í könnun MMR í síðasta mánuði kom fram að meirihluti landsmanna er hlynntur því að fyrirtækjum með 25 eða fleiri starfsmönnum verði skylt samkvæmt lögum að fá jafnlaunavottun.

Frumvarp félags- og húsnæðismála var þó nokkuð umdeilt áður en það varð að lögum í lok síðasta mánaðar. Brynjar Níelsson, þingmaður Sjálfstæðisflokksins, var sérstaklega hávær í gagnrýni sinni en greiddi þó að lokum atkvæði með frumvarpinu.

„Kannski eins og einhverjir vita hér inni þá hef ég nú ekki átt svefnlausar nætur af hrifningu yfir þessu máli. Þrátt fyrir þessa litlu hrifningu er ég nú á græna takkanum. Á fagmáli heitir það að kyngja ælunni í þágu mikilvægra hagsmuna. Ég segi já,“ sagði Brynjar þegar hann gerði grein fyrir atkvæði sínu á dögunum.