Manndráp í Mosfellsdal: Öll hin handteknu í gæsluvarðhald og einangrun

Fimm manns hafa verið úrskurðaðir í fimmtán daga gæsluvarðhald, eða til 23. júní, vegna gruns um aðild að líkamsárás í Mosfellsdal í gær sem leiddi til dauða karlmanns á fertugsaldri.

Sjötti einstaklingurinn var úrskurðaður í átta daga gæsluvarðhald, eða til 16. júní. Öllum hinum grunuðu verður haldið í einangrun.

Fimm karlar og ein kona voru handtekin vegna málsins  en maðurinn var úrskurðaður látinn á Landspítalanum í Fossvogi eftir að ráðist var á hann við Æsustaði í Mosfellsdal um kvöldmatarleytið í gær.

Fram kom í tilkynningu lögreglu í dag að rannsókn málsins sé mjög umfangsmikil og að hún sé í algjörum forgangi.

Grímur Grímsson, yfirlögregluþjónn sem fer með rannsókn málsins, segir að nú taki við áframhaldandi yfirheyrslur.

„Nú erum við að átta okkur á stöðunni og safna saman gögnunum. Við sjáum til hvort það verður gert um helgina eða hvort við gerum það í næstu viku," segir Grímur. Hann segist eiga von á því að einhverjar yfirheyrslur á vitnum verði um helgina.

Fréttin hefur verið uppfærð.