Fólk í sjávarútvegi finnur nú fyrir versnandi afkomu vegna styrkingar krónunnar. Á sama tíma skapar umræða um hækkun veiðigjalda óvissu um framtíðina. Þetta kom fram í samtölum Stöðvar 2 á Snæfellsnesi á dögunum, sem sjá má í spilaranum hér að ofan. 

Í Snæfellsbæ eru yfir eitthundrað fiskiskip gerð út en engar stórútgerðir.  Þar eru það einstaklingsútgerðir  og lítil fjölskyldufyrirtæki sem einkenna byggðina. Þegar við spurðum um afkomuna fengust meðal annars þessi svör:

„Þetta væri nú allt í lagi ef krónan væri ekki svona rosalega sterk. Hún er að trufla okkur,“ segir Kristín Vigfúsdóttir, framkvæmdastjóri Valafells ehf., sem rekur saltfiskverkun og gerir út einn dagróðrabát. 

Trillukarlinn finnur fyrir þessu: 

„Krónan, hún er að hrekkja okkur mjög mikið,“ segir Rafn Guðlaugsson sjómaður, sem rær frá Ólafsvík með syni sínum á Katrínu SH.

-Getið þið búið við stöðuna eins og hún er í dag , - með krónuna? 

„Nei, við getum það ekki,“ svarar Rafn. 

-Ætlið þið að fara að grenja út gengisfellingu, eins og var gert í gamla daga? 

„Nei, nei, við gerum það ekki. Þeir redda þessu einhvern veginn,“ svarar smábátasjómaðurinn.

Sjómennirnir fá minna útborgað:

„Það lækka náttúrlega launin. Launin eru í fiskverðinu,“ segir Ómar Marísson, háseti á Saxhamri SH. 

Svo komu skellir eins og sjómannaverkfall og lokun Nígeríumarkaðar.

„Við höfum til dæmis ekki getað selt hausa og bein, sem hleypur á milljónum. Sem er bara tekjuskerðing, - á meðan við fögnum því að olía sé að lækka,“ segir Alexander Friðþjófur Kristinsson, framkvæmdastjóri Sjávariðjunnar ehf. á Rifi.

Hér hefur afkoma sjávarútvegs víðtæk áhrif á samfélagið. 

„Þetta er náttúrlega keðjuverkandi. Fólk hefur vinnu í bæjarfélögunum, - eins og til dæmis hjá okkur. Hérna hafa þrjátíu manns vinnu, hátt í fjörutíu með sjómönnum,“ segir Kristín í Valafelli.

Kröfur eru um hærri veiðigjöld.

„Mér finnst mjög eðlilegt að sjávarútvegurinn borgi veiðigjöld, - svo það sé nú alveg á hreinu og enginn misskilji  það,“ segir Kristinn Jónasson, bæjarstjóri Snæfellsbæjar.

„En það er alveg sama hvern þú heyrir, sem ætlar að leysa vanda Íslendinga. Þeir ætla allir að taka peningana úr sjávarútveginum. Þannig að ef þú myndir leggja það saman þá er það meira en sjávarútvegurinn er að afla yfir árið, bara í heild sinni,“ segir bæjarstjórinn. 

„Ég er alveg hlynntur þessari skattlagningu. En hún verður náttúrlega að vera réttmæt. Við verðum að vera samkeppnishæfir annars staðar í heiminum. Við erum stanslaust í samkeppni við Noreg og erum búnir að tapa gríðarlega miklum fjármunum á verkallinu núna,“ segir Alexander í Sjávariðjunni. 

Óvissan um veiðigjöldin er slæm, segir bæjarstjórinn. 

„Þetta er alveg eins og í öðrum viðskiptum. Öll óvissa skapar ákveðna hættu og það er slæmt fyrir okkur.

Best væri ef við Íslendingar gætum bara komist að einhverri niðurstöðu og sagt: Þetta verður svona næstu tíu árin. Þá myndum við hafa það nokkuð gott. En óvissan er aldrei góð, - í þessu né öðru,“ segir Kristinn bæjarstjóri.