Kolólöglegt tómstundagaman

Margir Íslendingar kannast við afa sem otar ávallt að manni aðeins of sætri flösku af campari eða hvítvíni sem fær tunguna til að límast upp við góm. Aðrir eiga kannski bjórsnobbara-vini sem eru að prufa sig áfram með nýjum amerískum ofurhumlum og vilja sífellt ræða við mann um kanilkeiminn sem þeim hefur tekist að ná fram í bjórnum.

Þetta fólk getur verið til ama, en okkur þykir líka vænt um þau og viljum ekki sjá þau fara í fangelsi fyrir tómstundagaman sitt. Enda er lögum um heimabrugg lítt framfylgt, mörg heimabruggsfélög starfa fyrir opnum tjöldum, fólk spyr ráða á facebook, og sumir þeir ævintýralegustu fara síðar út í atvinnumennsku og stofna eigin brugghús.

Okkur fannst merkilegt að hugsa til þess um daginn þegar bjórinn varð 28 ára í sögu Íslands (annars staðar er hann um nokkur þúsund ára), að heimabruggun er ennþá ólögleg. Þetta er enn eitt dæmið um það hversu ófrjálslynt Ísland er í samanburði við nágrannalönd, jafnvel þau ríki sem við kennum helst við forræðishyggju. Noregur og Svíþjóð t.d. hafa ekki sex ára fangelsisvistunarákvæði við heimabruggi. Við erum einstök hvað það varðar.

Á þessu stigi málsins hefur umræða um áfengismál skyggt á nærri allt annað í umræðunni. Í stað þess að ræða blekkingar og lygar háttsettra ráðherra, húsnæðisskortinn eða óstöðugt fjármálaumhverfi Íslands, erum við að deila um áfengi. Nú þegar hefur umræðan um áfengisfrumvarpið fengið helminginn af þeim ræðutíma sem fór í síðustu fjárlög. Við ætlum því ekki að sóa tíma ykkar í rök með og á móti, en benda þennan eina hlut sem við ættum öll að geta verið sammála um. Lögin um heimabrugg eru úrelt og skaðleg, því jafnvel þó þeim sé ekki framfylgt skilgreina þau ótal Íslendinga sem glæpamenn, og ala þannig á vanvirðingu við lögin.

Á síðasta þingi lagði Helgi Hrafn Gunnarsson þingmaður Pírata fram frumvarp til að breyta þessu. Með sér hafði hann meðflutningsmenn úr öllum flokkum nema VG. Það er synd að mál lifi ekki milli þinga, ef svo væri gæti Alþingi komið saman í dag og með einni atkvæðagreiðslu gert heimabrugg löglegt, eins og langflestir Íslendingar telja það eiga að vera. Með þeirri atkvæðagreiðslu yrði Ísland örlítið frjálslegra og væri með talsvert skynsamari og heilbrigðari afstöðu til áfengis. En ein breytingatillaga á því frumvarpi um áfengislög sem er verið að ræða inn á þingi núna þar sem refsing við heimabruggi er felld úr refsilögum væri til dæmis ein leið til að klára málið.

Bönn virka illa, og þegar ekki einu sinni er hægt að framfylgja þeim nema með gríðarlegum persónunjósnum inn á hverju einasta heimili landsins, þá virka þau alls ekki.