Stýrir nemendasýningu DWC í tíunda skipti

Þetta er tíunda skipti sem ég set upp nemendasýningu Dansstúdíós World Class,“ segir Stella Rósen­kranz, deildarstjóri og danskennari hjá Dansstúdíó World Class, eða DWC, en nemendasýning skólans fer fram í Borgar­leikhúsinu dagana 18. og 21. mars.

Undanfarin ár hefur DWC sett upp skemmtilega sýningu byggða á líflegum ævintýrum sem börnin þekkja vel og hefur undirbúningur sýningarinnar oftar en ekki verið hápunktur nemenda yfir önnina.

„Undirbúningur gengur vel, við erum að setja upp Kalla og súkkulaðiverksmiðjuna, sem hefur verið á planinu síðustu fimm ár, einfaldlega vegna þess að það er uppáhaldsævintýrið mitt. Síðustu tíu ár höfum við farið í alls konar ævintýraheima. Í ár erum við með frumsamið handrit eftir kvikmyndinni Kalli og súkkulaðiverksmiðjan þar sem Johnny Depp lék aðalhlutverkið,“ segir Stella.

Björn Bragi Arnarsson, uppistandari og fjölmiðlamaður, sér um kynningu á sýningunni.

„Hann hefur verið sögumaður sýningarinnar síðustu ár og alltaf slegið í gegn, hann er einstaklega góður í því og fær allan salinn með sér,“ segir hún og bætir við að sérstaða skólans sé sú að þau hafi frumsamið handrit þar sem nemendur skólans fá að spreyta sig í leiklistinni og fara með aðalhlutverk sögupersóna ævintýrsins á stóra sviði Borgarleikhússins.

Alls verða sex sýningar á tveimur dögum, en nemendum skólans hefur verið skipt niður á sýningar eftir því hvar þau æfa, þar sem fjöldinn er svo mikill.

„Skólinn hefur stækkað rosalega, en í ár erum við með átta hundruð nemendur og höfum við því tekið þá ákvörðun að skipta nemendum niður á sýningar eftir því hvar þau æfa svo allir fái að njóta sín,“ segir Stella.

Danshópur skólans mun koma fram, en hópurinn hefur vakið talsverða athygli síðustu misseri. Hópurinn hefur verið áberandi í tónlistarmyndböndum og nú síðast tóku nokkrir einstaklingar úr hópnum þátt í söngvakeppni sjónvarpsins sem fram fór á RÚV um síðustu helgi.

„Það er mikil stemning í skólanum og allir virkilega spenntir. Það er óhætt að segja að sýningin verður góð skemmtun fyrir bæði þá sem tengjast skólanum og þá sem hafa gaman af því að fara með börnin sín á líflega og skemmtilega danssýningu. Hildur Kristín Stefánsdóttir söngkona kemur og tekur lagið í lok sýningarinnar,“ segir Stella en hægt er að frá frekari upplýsingar um sýninguna, ásamt því að panta miða, á tix.is.