Fordæmalaus aukning á útblæstri hér á landi

Losun gróðurhúsalofttegunda á hvern íbúa hér á landi er um 14 tonn af koldíoxíðsígildum en er 4,9 tonn á heimsvísu og 7,4 tonn að meðaltali í ríkjum Evrópusambandsins. Þetta er meðal þess sem kemur fram í skýrslu Bjartar Ólafsdóttur, umhverfis- og auðlindaráðherra, um stöðu og stefnu í loftslagsmálum sem lögð var fram á Alþingi í gær.

Þar kemur einnig fram að losun gróðurhúsalofttegunda á Íslandi hefur aukist um 26% frá 1990 til 2015 og var um 4,6 milljón tonn af CO2-ígildum árið 2014. Á sama tíma hefur losun dregist saman um 24% samtals í 28 ríkjum ESB. Nýbirt spá í skýrslu Hagfræðistofnunar Háskóla Íslands bendir til að losun hér á landi geti aukist um 53-99% til 2030. Sé tekið tillit til kolefnisbindingar með landgræðslu og skógrækt er aukningin 33-79%. „Líklega eru fá eða engin dæmi um jafn mikla fyrirsjáanlega aukningu í losun til 2030 hjá öðrum þróuðum ríkjum,“ segir orðrétt í skýrslunni.

Samkvæmt skýrslu Bjartar verður erfitt fyrir Ísland að standa við Kýótó-bókunina sem gildir frá 2013-2020. Slíkt mun verða kostnaðarsamt því stjórnvöld þurfa þá að kaupa losunarheimildir. Ímynd Íslands er brothætt að mati Bjartar því hætt er við að fáir líti til Íslands sem fyrirmyndar ef losun eykst meira hér en í flestum eða öllum þróuðum ríkjum til 2030. Ekki sé endalaust hægt að vísa til hitaveituvæðingar fortíðarinnar sem dæmis um framsækni Íslands í loftslagsmálum að mati hennar.

Ísland hefur fullgilt Parísarsamninginn og sent inn landsákvarðað framlag með markmið til 2030. Í því segir að Ísland ætli sér að taka þátt í samevrópsku markmiði um minnkun losunar um 40% til 2030 miðað við 1990. Fyrir Alþingi liggur nú þingsályktunartillaga um aðgerðaráætlun í orkuskiptum.

Með tillögunni er stefnt að því að Ísland verði framarlega í notkun á endurnýjanlegum orkugjöfum á öllum sviðum. 

Stefnt er að því að hlutfall endurnýjanlegrar orku í samgöngum verði 10% árið 2020 og 40% árið 2030, en þetta hlutfall er nú um 6%.

Fréttin birtist fyrst í Fréttablaðinu.