Íslendingar beina viðskiptum sínum til netsins og frá landinu

Velta íslenskrar fataverslunar dróst saman um tólf prósent í janúar á milli ára, sem er sama mynstur og verið hefur undanfarin misseri. Fataverslun virðist vera eini angi verslunar á Íslandi sem ekki hefur náð vopnum sínum eftir hrun, þrátt fyrir kaupmáttaraukningu almennings, styrkingu krónunnar og niðurfellingu tolla á fatnaði og skóm.

Á sama tíma hefur sprenging orðið í afgreiddum sendingum hjá Íslandspósti. Erlendar sendingar til almennings jukust um 42 prósent á síðasta ári, í takt við niðurfellingu vörugjalda. Tekið skal fram að tölurnar eru ekki sundurliðaðar á vöruflokka en ljóst er að fatnaður er mjög fyrirferðarmikill í netverslun Íslendinga.

Andrés Magnússon, framkvæmdastjóri Samtaka verslunar og þjónustu, segir að þar á bæ klóri menn sér í hausnum yfir þessu þar sem allar forsendur séu uppi til að hagstætt sé að versla hér á landi.

„Það bendir allt til þess að netverslun hafi farið á algjört flug seinni hluta síðasta árs. Það mun koma enn betur fram á næstunni.“

Almenningur virðist sjá hag sinn í því að kaupa fatnað á netinu.

„Baráttan fyrir því að ná tollunum af var klárlega til að jafna samkeppnisstöðu fataverslunar á Íslandi við fataverslun í samanburðarlöndunum. Ef þú kaupir á netinu þá ertu að borga tvöfaldan virðisaukaskatt, bæði í landinu sem keypt er í og við komuna hingað til landsins. Samt sér fólk sér hag í því,“ segir Andrés.

Hann segist ekki vilja svara því hvort það þýði að álagning íslenskrar fataverslunar sé einfaldlega of mikil. Verslunarrekendur verði sjálfir að svara því.

„Þetta eru samt allt hlutir sem koma inn í myndina,“ segir Andrés.

Fréttin birtist fyrst í Fréttablaðinu