Elísabet Jökulsdóttir sakar borgina um ógnandi framkomu

„Ég er búin að eyða hverri einustu krónu í að kaupa þetta hús, einstæð móðir með tvö börn, og á það loksins næstum skuldlaust. Þá dynur þetta yfir,“ segir Elísabet Jökulsdóttir, einn margra Vesturbæinga sem mótmæla fyrirhuguðu hóteli og íbúðabyggingum á Byko-reitnum við Hringbraut og Sólvallagötu.

Á Byko-reitnum verður heimilt að byggja 4.300 fermetra hótel og 70 íbúðir. Hótelið, sem rísa á í horni lóðarinnar má vera fimm hæðir og íbúðarhúsin allt að fjórar hæðir og niður í tvær hæðir næst Framnesvegi. Ofan í jörðinni verður 4.100 fermetra bílakjallari.

Auk bréfa margra íbúa bárust Reykjavíkurborg athugasemdir frá skólaráði Vesturbæjarskóla, fulltrúa foreldra, íbúasamtökum Vesturbæjar og húsfélagi Sólvallagötu. Áhyggjurnar lúta meðal annars að mengun, umferðarþunga, bílastæðaskorti og að rekstri hótels á staðnum. Skipulagsráð hefur vísað málinu til meðferðar hjá verkefnisstjóra.

„Hér munu margir íbúar verða fyrir tjóni ef ný hótelbygging verður samþykkt í stað íbúða því hún mun skapa ónæði, hækkun fasteignagjalda, fækkun nágranna og minni fjölbreytni,“ segir í bréfi íbúasamtakanna.

Elísabet, sem býr á Framnesvegi 56a, fast við Byko-reitinn, segist hafa heyrt að byrja eigi að sprengja fyrir bílakjallara í maí. „Mér skilst að það verði sprengingar hér í eitt eða tvö ár. Kannski þolir húsið þetta en ég ætla ekki að búa við þessar sprengingar og neyðist til að flytja á meðan þetta stendur. Ég veit ekki hvort það er réttlætanlegt að leigja húsið út á meðan,“ segir hún.

Samkvæmt skipulaginu má sameina Byko-reitinn og lóðina undir húsi Elísabetar og lóðina við hlið hennar lóðar. Hún segir að þegar hún hafi farið inn á borgarskipulag til að kynna sér framkvæmdina hafi starfsmaður þar spurt hvort hún vildi ekki bara selja eiganda Byko-reitsins húsið sitt.

„Það er alltaf verið að segja við mig að selja og það er eins og enginn skilji að maður vilji bara eiga heimili sitt,“ segir Elísabet. Hún hafi sömuleiðis fengið sérkennileg tilsvör á byggingarstað við Vesturbæjarskóla, handan Framnesvegar. „Þar stóð maður frá borginni og ég sagði honum að ég væri búin að skila inn athugasemdum. Hann hló bara upp í opið geðið á mér og sagði: Borgin gerir bara það sem borgin vill gera.“

Nær allir íbúar umhverfis reitinn eru að sögn Elísabetar andsnúnir áformunum. 

„Reykjavíkurborg átti að kaupa þessa lóð fyrir Vesturbæjarskóla,“ segir hún. Mjög hafi þrengt að skólanum með skúrum og viðbyggingum á þeim 27 árum sem hún hafi búið í hverfinu. „Þarna er bara yfir eina götu að fara og auðvelt að tengja með brú eða undirgöngum. Þarna gæti verið leikfimihús og skólalóð.“

Elísabetu finnst borgin ganga fram af miklu skeytingarleysi.

„Það hafa komið hér borgarfulltrúar inn í garðinn við hliðina og spurt: Af hverju er ekki búið að byggja hér? Þetta er bara pínulítill garður og maður hugsar með sér að það sé stór gjá milli borgarstjórnar og borgarbúa. Manni líður eins og Palestínuaraba á landnemabyggð undir þessari ógnandi framkomu. Hér verða húsin hvert ofan í öðru samkvæmt þeirra trúarbrögðum um þéttingu byggðar,“ segir Elísabet sem kveðst hafa áhyggjur af því að kunna að neyðast til að flytja úr húsinu sem sé æskuheimili sona hennar.

„Ég var að greinast með æxli og ætla að hugsa um mína heilsu og hef ekki orku í að skemmta Reykjavíkurborg og fleirum með því að fara út í einhverja baráttu út af húsinu mínu. Það verður bara að láta þetta allt ráðast.“

Fréttin birtist fyrst í Fréttablaðinu.