Þórdís Elva segir skilaboð frá 16 ára indverskum dreng standa upp úr: „Nú veit ég að ég hafði rangt fyrir mér“

„Eftir milljón áhorf, þúsundir athugasemda og hundruð frétta eru þessi skilaboð frá sextán ára indverskum dreng það sem stendur upp úr, í hjarta mínu,“ skrifar Þórdís Elva Þorvaldsdóttir á Facebook síðu sinni.

Fyrirlestur Þórdísar Elvu og Tom Stranger um kynferðisofbeldi sem Þórdís varð fyrir af höndum Tom hefur vakið mikla athygli um allan heim. 

Í skilaboðunum segir drengurinn að fyrirlestur þeirra hafi breytt viðhorfi sínu til kynferðisofbeldis. Áður hafði hann talið að kynferðisofbeldi væri á ábyrgð þolenda.

„Ég er sextán ára. Ég bý á Indlandi, landi þar sem forboðið er að tala um kynlíf. Um 1,2 milljarður manns býr hér og aldrei líður dagur án þess að furðulegt nauðgunarmál komi í fréttum. Þangað til í gær hélt ég að það væri konum að kenna að þær gætu ekki verndað sig. Að þær finnist þær ekki ábyrgar gjörðum sínum. En nú finnst mér ég hafa haft rangt fyrir mér,“ skrifar hann.

„Ég sá TED fyrirlesturinn þinn í dag og hann breytti viðhorfi mínu algjörlega. Ég horfði þrisvar á myndbandið vegna þess að ég trúði ekki mínum eigin eyrum. Ég grét eftir áhorfið vegna þess að mér finnst ég vera hluti af samfélagi sem skapar alltaf kaldranalegt umhverfi fyrir alla. Fyrirlesturinn þinn hefur veitt mér innblástur og ég heiti því að ég mun aldrei aftur einu sinni hugsa um að beita konu ofbeldi.“

 

Í fyrirlestrinum reifa þau Þórdís og Tom sögu sína í sameiningu á opinskáan hátt. Þar lýsir Þórdís því að á jólaballi hafi hún ákveðið að drekka romm í fyrsta skipti og orðið ofurölvi. Tom hafi hjálpað henni heim og hún hafi verið honum þakklát þar til hann klæddi hana úr fötunum, lagðist ofan á hana og nauðgaði henni. Hún hafi verið með meðvitund en ekki haft kraft til að streitast á móti.

Hún segir að hún hafi ekki upplifað atvikið sem nauðgun vegna þess að Tom hafi ekki verið sú ímynd af nauðgara sem hún hafi séð í kvikmyndum. Þegar hún áttaði sig á að henni hafði verið nauðgað var skiptinámi Tom lokið og hann farinn aftur til Ástralíu.

Tom segist sjálfur ekki strax hafa áttað sig á að hann hefði nauðgað Þórdísi. Hann hafi afneitað sannleikanum og sannfært sjálfan sig að um kynlíf hefði verið að ræða en ekki nauðgun.

„Ég sagði Þórdísi upp nokkrum dögum seinna og sá hanna nokkrum sinnum aftur á meðan ég dvaldi á Íslandi og fékk sting í hjartað í hvert sinn. Innst inni vissi ég að ég hefði gert eitthvað skelfilega rangt. En án þess að átta mig á því gróf ég minninguna djúpt niðri.“

Þegar Þórdís hafi haft samband hafi honum boðist einstakt tækifæri til að horfast í augu við gjörðir sinar. Hann segir að ekki megi vanmeta mátt orða og að það að segja við Þórdísi að hann hafi nauðgað henni hafi breytt sýn sinni á sjálfan sig.

„En það sem mestu skiptir er að ég færði ábyrgðina frá henni og yfir á mig.”

Hægt er að sjá fyrirlesturinn í heild sinni í spilaranum hér fyrir neðan.