Febrúarspá Siggu Kling – Fiskur: Ert á tímabili uppgjörs

Elsku fiskurinn minn. Ef það er eitthvað sem er að murka lífið úr hjartanu þínu þá er það þér að kenna, og þú hefur svo sannarlega vald til að skipta um skoðun og hafa þessa febrúarbíómynd alveg eins og þú vilt. Þú ert að setja orkuna þín í alltof margt. Einfaldaðu lífið, þá líður þér miklu betur.

Það er svo mikilvægt fyrir þig, eins litríkur og þú ert, að þú eigir svolítið þitt svæði. Getir nýtt þér það að vera hellisbúi, hvílt þig meira og slökkt bara á símanum. Ég er nú viss um að ég sjái engan möguleika á að þú gerir það. Það er að hrúgast að þér fólk, og þér þykir mjög skrítið að það vilji vera í kringum þig. Þú ert að gefa frá þér svo mikla gleðitíðni og laðar þar af leiðandi að þér alls kyns fólk, sem vill koma og vera með þér í þessu partýi. Á þessu tímabili uppgjörs, sem það svo sannarlega er því að þú átt afmæli, þarft þú að skoða hverjir gleðja þig og hverjir græta þig.

Þú færð svo mikið val á uppstokkun á fólki og þú munt nýta þér það án þess að sýna því nokkurn dónaskap. Það er algengt að þú sért listrænn úr því að þú ert svo heppinn að fæðast sem fiskur, og þeir sem að hafa nýtt sér þessa gjöf munu ná langt á þessu ári og mikill kraftur falla þeim í skaut nákvæmlega núna. Ný sambönd verða til hjá þeim sem eru á lausu og vita hvað þeir vilja.

Gömul sambönd endurnýjast og verða sterkari. Þetta er skemmtilegt rock n‘ roll, mikið um boð og alls kyns skemmtanir. Og þú lendir í aðstæðum sem munu breyta svo mörgu í lífi þínu. Þetta er eins og dómínó, einn dómínókubbur fellur þá falla hinir þrjú þúsund. Þessi kraftur verður yfir til enda apríl. Fólk trúir því sem þú segir, svo segðu bara satt, þá færð þú það sem þú vilt

Mottó – þú hefur sömu kennitölu og hamingjan

Frægir Fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign og Baby Kling, Lína Rut listaperla.