Baggalútsmenn öfluðu 124 milljóna fyrir jólin

Miðasölutekjur vegna sautján jólatónleika Baggalúts í fyrra námu 124 milljónum króna. Uppselt var á þá alla og einkahlutafélag sjö liðsmanna Baggalúts skilaði 10,8 milljóna hagnaði eftir síðustu jólavertíð.

Baggalútur hefur undanfarin ár staðið fyrir vinsælustu jólatónleikum landsins í Háskólabíói. Miðar á þá hafa selst upp á nokkrum klukkutímum en samkvæmt nýjum ársreikningi Baggalúts ehf. kostaði tónleikahaldið í fyrra um 104 milljónir króna.

Kostnaðurinn jókst um tólf milljónir milli ára en félagið, sem heldur einnig utan um vefsíðu og plötuútgáfu grínhópsins, skilaði methagnaði árið 2015 eða jákvæðri afkomu upp á 14,8 milljónir. Alls hefur það verið rekið með 42 milljóna hagnaði frá árinu 2012.  

Heildartekjur Baggalúts í fyrra námu 127 milljónum og veltuna má því að mestu rekja til tónleikahaldsins í desember. Greiðslur til tónlistarmanna sem að því komu námu 81 milljón og þær því langstærsti kostnaðarliðurinn

Til samanburðar seldi Baggalútur jólatónleikamiða fyrir 42 milljónir árið 2013. Þá voru sjö ár síðan hópurinn hélt sína fyrstu jólatónleika. Þeir voru í Iðnó á Þorláksmessu. 

Áður hefur komið fram að eigendur félagsins hafa aldrei greitt sér út arð og á árinu 2016 varð engin breyting þar á. Þeir áttu þá um 99 milljónir í handbæru fé og markaðsverðbréfum en eignir félagsins voru þá 58 milljónum hærri en skuldirnar og námu alls 112 milljónum.

Baggalútur er í eigu Braga Valdimars Skúlasonar, tónlistarmanns og framkvæmdastjóra félagsins, og sex annarra stofnenda vefsíðunnar baggalutur.is sem hópurinn opnaði árið 2001. Eiga þeir allir 14,3 prósent í fyrirtækinu.

Bragi Valdimar hefur áður sagt að eigendur félagsins vilji heldur greiða mönnum góð laun en arð út úr félaginu. Meðlimir sveitarinnar séu eins og stórfjölskylda sem hittist nánast eingöngu á jólunum og að félagið hafi svo að segja verið stofnað í þeim tilgangi að halda utan um jólavertíðina. Ekki náðist í Braga Valdimar við vinnslu fréttarinnar.