Reyna að fá íslenskar stúlkur til að vinna sem módel í Kanada

Lögreglan á höfuðborgarsvæðinu hefur að undanförnu haft til skoðunar mál er varðar erlent fyrirtæki sem hefur sett sig í samband við íslenskar stúlkur í þeim erindagjörðum að fá þær til þess að sinna módelstörfum í Kanada.

Þetta kemur fram í tilkynningu frá lögreglunni á höfuðborgarsvæðinu.

„Lögreglan varar við því að þiggja slík boð án þess að kanna gaumgæfilega það fyrirtæki sem á í hlut og biðlar til þeirra stúlkna sem hefur verið rætt við á síðustu dögum að setja sig í samband við Lögregluna á höfuðborgarsvæðinu vegna þessa í gegnum facebooksíðu embættisins eða netfangið abending@lrh.is,“ segir í tilkynningunni.