Febrúarspá Siggu Kling – Krabbi: Ekki búa til eitthvað leikrit

Elsku magnaði krabbinn minn, þú ert svo spennandi karakter, oft svo ægilega leyndardómsfullur en yfirleitt svo kraftmikill og geislandi. Þú hefur oft mikið vald yfir öðrum, vegna þess hversu kraftmikill þú ert.

Það er algengt að margir taki þig sem fyrirmynd, en oft líður þér þannig að þú sért bara með lítið brostið hjarta. Það er alls ekki hægt að segja að þú lítir þannig út. Það verða margar orrustur háðar þessa mánuði sem fram undan eru og þú átt eftir að gera allt sem í þínu valdi stendur til að finna réttu leiðina að sigrinum.

Það er gott fyrir þig að temja hugann betur, fara í einfalda hugleiðslu eins og til dæmis að gefa sér meiri tíma þegar þú ferð í bað, eða setja góða lykt inn á heimilið þitt og slaka á þegar þú hefur góðan tíma, því að það er mikil keppni fram undan og þú ert reiðubúinn til að taka fyrsta sætið. Það er þér svo afskaplega mikilvægt elskan mín, að vera í góðu formi. Og þú átt það til að tapa kraftinum þínum ef þú ert ekki nógu ánægður með sjálfan þig. Farðu að elska hvað þú ert sexý, því þá margfaldast útgeislunin þín. Ekki vera háður líkamlegri fegurð því að útgeislunin kemur að innan.

Og þú ert sannarlega með útgeislun eins og Hollywood-stjarna. Dásemdin okkar hann Ólafur Darri, kannski 500 grömmum of þungur, var kosinn kynþokkafyllsti maður Íslands um árið, svo að það er útgeislunin og sjálfstraust sálarinnar sem skiptir öllu máli. Það er mikill sprengikraftur í ástinni hjá þér, og margir möguleikar fyrir þá sem eru á lausu. Þú einhvern veginn getur talað alla til og talað alla til þín. Máttur orða þinna er mikill - ekki búa til eitthvað leikrit - vertu bara einlægur, þá dafnar ástarsambandið og þér líður svo miklu miklu betur.

Mottó – Þetta er besti kaflinn í lífi mínu, því að ég er að skrifa hann.