Fermetraverð hefur hækkað um allt að 58 prósent frá hruni

Frá hruni hefur fasteignaverð hækkað um allt að 58 prósent miðað við nýjustu tölur Þjóðskrár um meðalfermetraverð fjölbýlishúsa. Mesta hækkunin hefur átt sér stað í Garðabæ, miðborg Reykjavík, á Seltjarnarnesi og í Fossvogi. Þar hefur meðalverð á hvern seldan fermetra hækkað á bilinu 50 til 58 prósent.

Miðborgin og Vesturbærinn dýrustu staðirnir

Dýrasti fermetrinn í fjölbýli er samkvæmt gögnunum í miðborginni, á svæði sem er innan Hringbrautar og Snorrabrautar í Reykjavík. Þar var meðalverð á fermetra tæpar 427 þúsund krónur árið 2015.

Næstdýrasti fermetrinn er í Fossvogi, í Löndunum, þar sem að meðaltali var greitt 384 þúsund fyrir. Fermetraverðið í Vesturbænum var á svipuðum slóðum, 383 þúsund krónur, sem og í Sjálandshverfinu í Garðabæ, 381 þúsund krónur.

Á hinum endanum eru Vangar í Hafnarfirði, þar sem fermetrinn kostaði að meðaltali 252 þúsund krónur, í Seljahverfinu í Reykjavík, þar sem verðið var gott sem það sama, og í Álfaskeiði í Hafnarfirði, 266 þúsund. Verð í Álfaskeiði hefur þó sveiflast talsvert á milli ára og þurfa tölur þaðan að skoðast í því ljósi.

Umtalsverð hækkun síðustu ár

Fasteignaverð hrundi á árunum 2009 og 2010 en samkvæmt gögnunum lækkaði verð á nær öllum svæðum á þeim tíma. Álfaskeið í Hafnarfirði sker sig úr í gögnunum en þar hækkaði fermetraverð um 27 prósent á milli áranna 2008 og 2009. 

Það er algjört einsdæmi á þessum tíma. Árið eftir lækkaði svo verð þar um 42 prósent á milli ára, sem er mun meira en á öðrum svæðum, þar sem algengt var að meðalverð fermetra lækkaði um 5-10 prósent á milli ára.

Frá 2010 eru dæmi um að svæði hafi hækkað um rúmlega 60 prósent miðað við meðalverð fermetra fyrir síðasta ár.