Var ákveðin í að ná þessum áfanga

Aðalhundaþjálfari tollstjóraembættisins, Ingibjörg Ylfa Ólafsdóttir, hefur öðlast fullgild réttindi til að kenna leitarhundaþjálfun á vegum Frontex, Landamærastofnunar Evrópu og er komin þar á útkallslista. Samtals eru tuttugu og tveir á þeim lista og Ingibjörg Ylfa eini Íslendingurinn.

Réttindin hlaut hún eftir að hafa lokið fimmþættu prófi sem haldið var á vegum tollstjóra, með heildareinkunninni „Outstanding“, eða framúrskarandi. Áður hafði hún lokið leiðbeinandanámi hjá Frontex.

„Síðan ég hóf námið á vegum Frontex árið 2014 hefur ekkert annað komið til greina en að klára þennan áfanga,“ segir Ingibjörg Ylfa sem hefur líka réttindi til að dæma úttektir á leitarhundum í öðrum löndum og vonar að til þess komi einhvern tíma.

 „Það væri auðvitað mjög mikilvægt og ánægjulegt að geta komið á slíkri samvinnu milli landa,“ segir hún.

Ingibjörg Ylfa hefur starfað við þjálfun leitarhunda hjá tollstjóra síðan 2009 og er í því af lífi og sál.

„Í fyrra var haldið grunnnámskeið fyrir leitarhunda á vegum embættisins þar sem ég var skipuleggjandi og einn af þeim leiðbeinendum sem komu að kennslu á námskeiðinu. Það námskeið var liður í innleiðingu Frontex-staðalsins hér,“ segir hún stolt.



Greinin birtist fyrst í Fréttablaðinu 11. júní 2016.