Notar gervifætur frá Össuri eftir hákarlaárás: "Það besta sem komið hefur fyrir mig“

Þökk sé nútímatækni þarf það ekki að vera fötlun að missa útlim. Þetta segja tveir bandarískir afreksíþróttamenn sem staddir eru hér á landi til að veita stoðtækjafyrirtækinu Össuri ráðgjöf við þróun gervifóta.

Þegar brimbrettakappinn Mike Coots var 18 ára missti hann hægri fót fyrir neðan læri þegar hákarl réðst á hann á Hawaii. Hann segist ekkert hafa vitað um gerviútlimi og önnur stoðtæki þennan örlagaríka dag á ströndinni.

„Í dag segi ég oft að þetta sé það besta sem hafi komið fyrir mig. Augljóslega umbylti þetta lífi mínu, en það var breyting til hins betra.“

Mike segir að útlimamissirinn hafi verið honum erfiður fyrst en í kjölfarið kviknaði hjá honum ný ástríða, sem er ljósmyndun, og í dag starfar hann sem atvinnuljósmyndari auk þess sem hann lætur fötlunina ekki stöðva sig heldur stundar enn brimbretti og aðrar íþróttir af kappi.

Grét þegar hann gat hlaupið í fyrsta sinn

„Margir halda að fötlun þýði að þú getir ekki gert hitt og þetta. Ég kann reyndar ekki að meta þetta orð, því með réttu tækninni er margt sem þú getur gert og ég get gert allt það sem vinir mínir með tvo fætur gera.“

17 ár eru liðin frá hákarlaárásinni og Mike segir framfarir í tækninni með hverju ári ótrúlegar.

„Í sannleika sagt þá breytti fóturinn sem ég er með núna lífi mínu. Núna hleyp ég á hverjum degi. Ég fékk hann hér á Íslandi fyrir einu og hálfu ári og þá hafði ég aldrei hlaupið frá árásinni. Þau létu mig fá hlaupafót, sögðu mér að setja hann á mig og hlaupa af stað. Fjórum mínútum síðar var ég á harðaspretti og tárin runnu niður kinnarnar á mér. Þetta var eitt af bestu augnablikum ævi minnar.“

Bylting frá því hún fékk fyrsta tréfótinn

Sarah Reinertsen hefur um árabil starfað með Össuri við vöruþróun, en hún missti vinstri fót við mjöðm aðeins sjö ára gömul vegna vefjasjúkdóms. „Fyrsti gervifóturinn minn var tréleggur með tveimur hjörum og gúmmífæti, svo ég hef séð sprengingu verða í tækni gerviútlima með tímanum. En þetta er stöðug framþróun og þess vegna er svo spennandi að koma hingað í höfuðstöðvar Össurar og sjá hvaða nýjungar eru væntanlegar næst.“

Sarah tók fyrst þátt í Ólympíuleikum fatlaðra 1992 og varð síðar einnig fyrsta konan með gervilim til að klára járnmanninum á Hawaii. Hún stefnir nú á Ólympíuleika fatlaðra í Ríó 2017 til að keppa í þríþraut og segist þegar fullbúinn til fararinnar með nýjum fótum frá Össuri.

Skápurinn fullur af gervifótum

„Ég á reyndar heilt safn af gervifótleggjum. Ég er með sérstakan fót sem ég ætla að taka með mér fyrir hlaupið og svo annan fót fyrir hjólreiðarnar, þannig að þetta eru nokkrir keppnisfætur. Það er spennandi að við lifum núna á tímum þar sem ég get haft úrval af gerviútlimum að velja úr. Rétt eins og fólk velur mismunandi skó fyrir ólíkar íþróttir þá getum við núna falið okkur fót eftir tilefni.“