Kristilegir leiðtogar á einkaþotu skoða aðstæður á Íslandi

Kristilegir útsendarar Trinity Broadcasting Network, sem er stærsta kristilega fjölmiðlafyrirtæki heims, eru nú staddir á Íslandi. Þeir eru sérlegir gestir Omega – kristilegrar sjónvarpsstöðvar. Ekki er vitað nákvæmlega hvað þeir eru að vilja á Íslandi, en talsmenn Omega verjast allra frétta.

Umsvif Trinity Broadcasting Network eru veruleg. Um er að ræða alþjóðlegt fjölmiðlafyrirtæki en höfuðstöðvar TBN eru í Costa Mesa í Kaliforníu. Og víst er að um verulega stöndugt fyrirbæri er að ræða, enda ferðast útsendarar TBN um á einkaþotum. Einkunnarorð þeirra eru: „TBN is the world's largest religious network, delivering the Christian message of hope around the globe“.

Samkvæmt heimildum Vísis hefur þotan verið á Reykjavíkurvelli nú í nokkra daga en áætlað er að hún fari af landi brott nú uppúr hádegi.

Vísir hefur ítrekað reynt að ná tali af Eiríki Sigurbjörnssyni, sjónvarpsstjóra Omega, bæði í dag og í gær, en án árangurs. Hann svarar engum skilaboðum, og mun hann ekki vera með farsíma. Guðmundur Örn Ragnarsson, sem var fyrir svörum hjá Omega, staðfesti að menn á vegum TBN væru gestir Omega en vildi að öðru leyti engar upplýsingar gefa. Var ekki betur á honum að skilja en hann teldi sig, og kristilega starfsemi almennt, brennda vegna umfjöllunar fjölmiðla – sem Guðmundi Erni sýnist andsnúnir kristilegu starfi.

Ísland hefur verið í sviðsljósinu að undanförnu, meðal annars vegna Panama-skjalanna og í kjölfarið hefur predikarinn Steve Anderson, í babtistakirkjunni Faithful Word, beint sjónum sínum hingað og gefið íslensku samfélagi heldur nöturlegar einkunnir, svo sem „bastarðaþjóð“ og „femínistahelvíti“. Hann telur engan vafa á því leika að Íslendingar séu á villigötum.

Hvort hér sé um vísbendingu að ræða þess efnis að til standi að setja aukinn kraft í kristilegt starf á Ísland – eða ekki... um það eru engar upplýsingar fyrirliggjandi að svo stöddu.