Hnuplaði fyrir þúsundir króna

Karlmaður var staðinn að hnupli í verslun í umdæmi lögreglunnar á Suðurnesjum nýlega. Að því er segir í tilkynningu frá lögregluembættinu játaði maðurinn brot sitt þegar lögreglumenn ræddu við hann og skilaði varningnum, sem var að verðmæti á níunda þúsund krónur.

Þá stöðvaði lögreglan nýverið ökumann vegna gruns um fíkniefnaakstur. Ökumaðurinn reyndist undir áhrifum fíkniefna, auk þess sem kannabisefni og amfetamín fundust í bifreið hans.

Lögreglan hefur einnig haft í nógu að snúast hvað varðar umferðarlagabrot. Skráningarnúmer voru fjarlægð af sjö bifreiðum sem ýmist voru óskoðaðar eða ótryggðar og fjórir ökumenn voru staðnir að hraðakstri í umdæminu.