Öryrkjum fjölgað um 29 prósent

Öryrkjum á Íslandi hefur fjölgað um 29 prósent frá nóvember 2005 til nóvember 2015 samkvæmt upplýsingum frá vel­ferðar­ráðuneytinu. Mest hefur fjölgunin frá árinu 2005 verið á aldursbilinu 65 til 66 ára, hjá körlum um 59 prósent, og konum um 57 prósent.

Meginorsakir örorku eru geðraskanir og stoðkerfissjúkdómar. Þannig eru geðraskanir algengasta orsök örorku hjá körlum og hefur hlutfallið hækkað upp í að vera 44 prósent á þessu ári. Stoðkerfissjúkdómar eru nú 18 prósent hjá körlum.

Hjá konum eru stoðkerfissjúkdómar algengasta orsök örorku eða um 37 prósent en hlutfall geðraskana hefur einnig hækkað hjá konum undanfarin tíu ár og er nú 34 prósent.

Frá árinu 2010 hefur öryrkjum fjölgað um 1,7 til 2,1 prósent á milli ára. Hlutfall karla og kvenna hefur haldist nokkuð jafnt frá árinu 2005, konur eru 60 prósent öryrkja en karlar 40 prósent.

Hlutfall öryrkja af fólksfjölda hefur aukist um 1,2 prósent frá desember 2004 til desember 2014. Öryrkjar á aldrinum 18 til 66 ára voru að meðaltali sjö prósent af fólksfjölda á sama aldursbili í desember árið 2004 og 8,2 prósent í desember 2014.