Hafa fundað stíft frá því í byrjun mars

Enn hefur ekki komið til þess að sjómenn hafi hafið undirbúning verkfallsaðgerða vegna yfirstandandi kjaraviðræðna við útgerðarmenn. „Við vildum láta reyna til þrautar áður en farið yrði í þá vegferð,“ segir Hólmgeir Jónsson, framkvæmdastjóri Sjómannasambands Íslands.

Samninganefndir Sjómannasambandsins og Samtaka fyrirtækja í sjávarútvegi (SFS) hittust á samningafundi um miðjan dag í gær. Hólmgeir segir að fundað hafi verið stíft síðustu vikur. „Við höfum verið að funda vikulega og rúmlega það síðan í byrjun mars,“ segir hann.

Viðræður milli sjómanna, sem hafa verið samningslausir frá því í ársbyrjun 2011, og útgerðarmanna hófust aftur á síðasta ári, en upp úr þeim slitnaði í byrjun desember. Í kjölfarið og fram á nýja árið var kannaður hugur sjómanna, hjá aðildarfélögum þeirra, til hugsanlegra verkfallsaðgerða.

„Og niðurstaðan hjá aðildarfélögum okkar var að menn væru alveg til í aðgerðir,“ segir Hólmgeir. En á meðan viðræður standi sé alltaf von til þess að saman náist og á meðan verði ekki farið í verkfallsaðgerðir. „Auðvitað vona menn að þetta klárist fremur en að farið verði í slagsmál, en það er svo sem ekkert komið í ljós enn þá.“

Þá segir Hólmgeir að viðræðurnar nú séu látnar snúast um hluti sem líklegt sé að menn geti náð saman um og ítrustu kröfur sem settar hafi verið fram, svo sem um aukna þátttöku sjómanna í kostnaði útgerðarfyrirtækja, séu því ekki undir. „Það er verið að skoða það sem helst þarf að klára og hvernig menn vinna á milli kjarasamninga.“