Lögreglan beitti piparúða á mann sem abbaðist upp á viðskiptavini verslunar

Til átaka kom á milli lögreglumanns og karlmanns sem abbaðist upp á viðskiptavini verslunar á höfuðborgarsvæðinu. Þetta kemur fram í dagbók lögreglunnar en þar kemur var að tilkynning um manninn barst lögreglunni þegar klukkuna vantaði korter í tvö í dag.

Í dagbókinni kemur fram að lögreglumaður hafi reynt að ræða við manninn en það endaði með átökum sem lauk með því að lögreglumaðurinn beitti piparúða á manninn sem var síðan handtekinn.

Hann var færður á lögreglustöð og lokaður inni í fangaklefa þar til rætt verður við hann.

Rétt fyrir klukkan eitt í dag var bifreið ekið aftan á aðra á gatnamótum Sæbrautar og Skeiðarvogs. Eftir óhappið hljóp tjónvaldur af vettvangi en var handsamaður nokkru síðar. Bæði hann og farþegi í bifreiðinni voru eftirlýst af lögreglu og því handtekin. Voru færð til skoðunar á slysadeild en þaðan í fangageymslu. Tjónvaldurinn var grunaður um akstur undir áhrifum vímuefna.

Rétt fyrir hádegi í dag veitti lögreglan stolinni bifreið eftirtekt á Vesturlandsvegi. Var hún stöðvuð og þrír einstaklingar sem í henni voru handteknir. Í bílnum fannst nokkuð þýfi úr nokkrum málum og þremenningarnir vistaðir í fangageymslu og bíða þess að verða yfirheyrðir.