Umsátur á Akureyri: Skaut á íbúð nágrannakonu

Umsátur lögreglu um fjölbýlishús í Naustahverfinu á Akureyri í nótt beindist gegn manni sem skaut úr haglabyssu inn í anddyri nágrannakonu sinnar um klukkan hálftvö í nótt. Konan er einstæð móðir og þekkjast þau maðurinn ekkert utan þess að þau búa í sama húsi.

Lögregla fór á staðinn ásamt sérsveitarmönnum og gaf maðurinn sig fram við lögreglu um fimmleytið í nótt. Hann var færður í fangageymslu lögreglunnar á Akureyri og verður yfirheyrður í dag.

Samkvæmt heimildum fréttastofu skaut maðurinn alls um þremur skotum á hurð íbúðar konunnar. Hvorki konan né barn hennar, sem er tveggja ára, særðust en þau eru í talsverðu áfalli. Árásin virðist ekki hafa átt sér neinn aðdraganda.

Rannsókn lögreglunnar á Akureyri er hafin.