Öldungaþing Brasilíu íhugar að höfða mál gegn forsetanum

Öldungaþing Brasilíu ræðir nú hvort Dilma Rousseff forseti muni sitja réttarhöld sem gætu leitt til þess að hún missi embættið verði hún fundin sek. Rousseff er sökuð um að hagræða upplýsingum um efnahag þjóðarinnar til þess að fela vaxandi skuldastöðu landsins í kosningabaráttunni 2014 þegar hún náði endurkjöri. Kröftug mótmæli og óeirðir fylgdu í kjölfar þess að fjölmiðlar upplýstu um málið í mars.

Rousseff biðlaði nýverið til hæstaréttar landsins um að stöðva atburðarásina en þeirri bón var hafnað.

Ákveði öldungaþingið að höfða mál gegn forsetanum verður hún að láta af störfum samstundis á meðan á rannsókn málsins stendur. Verði hún fundin sek verður henni vikið formlega úr embætti. Þá mun Michel Temer, varaforseti, sitja út kjörtímabilið sem rennur út í desember 2018.

Rousseff og stuðningsmenn hennar höfðu vonast til að sleppa undan því að málið færi fyrir öldungaþingið eftir að kosning neðri deildar þingsins um að senda málið til öldungaþingsins var gerð ógild en allt kom fyrir ekki.