Bifröst nýtur trausts 

Gæðaráð íslenskra háskóla hefur lokið eftirfylgni með gæðaúttektum á Háskólanum á Bifröst og Háskólanum á Hólum. Í skýrslunum er lýst yfir trausti á starfsemi beggja skóla hvað varðar námsumhverfi nemenda og gæði þeirra prófgráða sem skólarnir bjóða upp á.

Gæðaráð íslenskra háskóla er skipað fimm erlendum sérfræðingum og starfar fyrir mennta- og menningarmálaráðuneytið. Það gerir úttektir á gæðum náms í íslenskum háskólum skv. rammaáætlun.

Eftirfylgnin er liður í skipulegu eftirliti gæðaráðsins með gæðum íslenskra háskóla, með sérstakri áherslu á nemendur, námsumhverfi og prófgráður.

Háskólinn á Bifröst og Háskólinn á Hólum gerðu sérstakar aðgerðaáætlanir í kjölfar þeirra úttekta. Þær áætlanir og framgangur þeirra voru skoðaðar af fulltrúum gæðaráðs með tilliti til eftirfylgni í byrjun febrúar á þessu ári, og lýkur því ferli með útgáfu skýrslna fyrir hvorn skóla.