Slysið í Noregi snertir íslensku Gæsluþyrlurnar ekki

„Málið hefur engin rekstrarleg áhrif á þyrlur Landhelgisgæslunnar og ekkert sem bendir til þess að svo muni verða“, segir Höskuldur Ólafsson, tæknistjóri flugrekstrardeildar Landhelgisgæslunnar, en norskir fjölmiðlar greindu frá því í gær að Rannsóknarnefnd flugslysa í Noregi teldi gögn benda til að orsök þyrluslyssins í Hörðalandi 29. apríl hafi verið bilun í gírkassa.

Eins og kunnugt er létust þrettán þegar Super Puma norska fyrirtækisins Statoil fórst við eyjuna Turøy ekki langt vestur af borginni Björgvin. Verið var að ferja starfsmenn fyrirtækisins af olíuborpöllum í Norðursjó þegar slysið varð og fljótlega var ljóst að um bilun í vélinni var að ræða – ekki mannleg mistök.

Þrjár af björgunarþyrlum Landhelgisgæslunnar eru Super Pumur – en af annarri gerð en sú sem fórst. Hins vegar hafa norsk flugmálayfirvöld kyrrsett margar þyrlur vegna slyssins og Flugöryggisstofnun Evrópu, EASA, íhugar aðgerðir.

Höskuldur segir að LHG fylgist náið með þessu máli, en rannsókn sé enn í fullum gangi á slysinu og ekki komin niðurstaða, aðeins getgátur um orsök slyssins.

Landhelgisgæslan rekur Super Puma þyrlur af AS332L1 gerð sem eru ólíkar þeim sem bannið í Noregi tekur til.

Spurður hvort flugvirkjar hafi skoðað þyrlur LHG sérstaklega með tilliti til kenninga Norðmanna um orsök slyssins, og hvort Gæslan sé í beinu sambandi við norsk yfirvöld segir Höskuldur: „Þar sem okkar vélar eru ólíkar þá er ekki ástæða til að skoða þær sérstaklega í tengslum við þetta slys. Við erum ekki í sambandi við norsku flugmálastjórnina. Við erum í góðu sambandi og samstarfi með Samgöngustofu og störfum í hvívetna eftir fyrirmælum frá EASA.“

Fréttin birtist fyrst í Fréttablaðinu 3. júní.