Davíð og Guðni eru með sama hárskerann

Svo skemmtilega vill til að Davíð Oddsson og Guðni Jóhannesson forsetaframbjóðendur, eru með sama hárskerann. Nefnilega Eirík Inga á Greifanum vestur í bæ.

Líkast til er þetta einstakt á heimsvísu, og ef til vill til marks um smæð Íslands, að forsetaframbjóðendur einhvers lands séu með sama hárskerann. Og þó. Eftirgrennslan Vísis leiðir í ljós að meta má það sem svo að um 400 hárgreiðslu- og rakarastofur séu á landinu öllu. Misjafnt er hversu mikla rækt menn leggja við hárvöxtinn og að hafa hann snyrtilegan, en þannig er talað um að 45 stofur sé að finna á Eyjafjarðarsvæðinu. Rakara- og hárgreiðslustofur eru skráðar með snyrtistofum hjá Hagstofunni og hefur þessi geiri velt um einum og hálfum milljarði árlega. Meta má það sem svo að annað eins í þeim geiranum sé svört atvinnustarfsemi.

Hvað sem þessu líður má heita víst að Eiríkur Ingi er fjölhæfur hárskeri því hárvöxtur þessara tveggja er ólíkur. Meðan Davíð státar af einhverjum þekktustu lokkum Íslandssögunnar, hárprúður með afbrigðum er hárvöxtur Guðna öllu hógværari.

Þegar Vísir þýfgaði Eirík Inga um þessa sérstöku stöðu koma á daginn að hann lítur nánast á það sem svo að menn setjist í skriftastól þegar þeir koma til hans í klippingu. Trúnaðurinn er algjör. „Þetta eru viðskiptavinir og maður á ekki að vera að blaðra mikið um þetta. Persónuleg viðskipti og um það ríkir trúnaður,“ segir Eiríkur Ingi fastur fyrir og verst allra frétta. Við komumst ekki að neinum leyndarmálum um þessa tvo menn sem svo áberandi eru í umræðunni þessa dagana, eftir þessum leiðum. Því miður.

Eiríkur Ingi hefur klippt Guðna lengi en Davíð er til þess að gera nýr viðskiptavinur hans, en Davíð var einn dyggasti viðskiptavinur Lýðs Sörlasonar rakara, en hann hætti nýverið störfum eftir 50 ár í bransanum. Davíð hefur nú leitað á náðir Eiríkur Ingi - en, ef einhvern tíma var mikilvægt að vera nýklipptur og fínn er það í forsetaframboði. Ímyndarfræðingar geta gleymt sínu bauki ef menn mæta til leiks eins og reittar hænur.