Neitar að hafa framið ránið

Maðurinn sem handtekinn var í gær í tengslum við vopnað rán í verslun Samkaup/Strax við Borgarbraut á Akureyri í fyrradag neitar sök í málinu. Hann er grunaður um að hafa ógnað starfsmanni með hnífi og þvingað hann til að opna peningakassa, þaðan sem hann rændi fjármunum.

Maðurinn, sem er um tvítugt, var úrskurðaður í vikulangt gæsluvarðhald í morgun og hefur verið yfirheyrður vegna málsins. Hann er sagður hafa komið til kasta lögreglu áður.

Að sögn lögreglunnar á Akureyri stendur rannsókn málsins enn yfir. Ekki hafa fengist upplýsingar um hversu mikið fjármagn maðurinn hafði á brott með sér.