Íslendingur í Kanada barðist við stórbruna í eigin verksmiðju

Stærsta rækju- og skelfiskvinnsla á Nýfundnalandi brann til kaldra kola í nótt. Engan sakaði og segir íslenskur rekstrarstjóri verksmiðjunnar að hún verði byggð upp á ný.

Quinlan Brothers-verksmiðjan er stærsti vinnuveitandi í smábænum Bay de Verde, skammt frá Harbour Grace. Vertíðin er um það bil að hefjast og stendur til októberloka og var ráðgert að rúmlega sjö hundruð manns ynni þar yfir vertíðina.

Íbúi í Bay de Verde náði þessu myndbandi af brunanum og deilir á Facebook:

April 11 2016

Posted by Mark Blundon on 12. apríl 2016

Tveir vaktmenn voru í húsinu og segja þeir að einhverskonar sprenging hafi orðið og eldurinn svo breiðst mjög hratt út.

Slökkvistarf stóð í margar klukkustundir, að sögn Kristins Skúlasonar rekstarstjóra, og er verksmiðjan nú rústir einar og er þetta mikið áfall fyrir alla starfsmennina sem ætluðu að vinna þar næstu mánuðina. 

Fjallað er um brunann í kanadískum fjölmiðlum. Í þessu myndskeiði CBC-fréttastofunnar er meðal annars rætt við bæjarbúa í Bay de Verde sem lýsa yfir miklum áhyggjum yfir því að verksmiðjan sé farin.

Kristinn er sjálfboðaliði í slökkviliði bæjarins og barðist sjálfur við eldinn í um fimmtán klukkustundir. Lögregla og fulltrúar tryggingafélaga eru nú að rannsaka eldsupptök, sem enn eru óljós. 

Þegar Kristinn spurði 86 ára gamlan aðaleiganda verksmiðjunnar um framhaldið, þá svaraði hann einfaldlega: Við byggjum þetta aftur upp, strákar.