Arion sveik loforð við Fjallabyggð

Bæjarráð Fjallabyggðar hefur óskað eftir því að fulltrúar Arion banka mæti á næsta fund bæjarráðs og fari yfir núverandi stöðu mála. Bæjarráðið er ósátt við uppsagnir á 6,4 stöðugildum í útibúum bankans í Fjallabyggð. „Þessar uppsagnir eru þvert á þær yfirlýsingar sem forsvarsmenn gáfu bæjarráðsfulltrúum og bæjarstjóra við yfirtöku Arion banka á Afli-Sparisjóði á Siglufirði,“ segir í fundargerð bæjarins.

Þann 28. september tilkynnti Ari­on banki að 46 starfsmönnum hefði verið sagt upp. Þar af störfuðu 27 í höfuðstöðvum bankans og 19 á öðrum starfsstöðvum. „Niðurskurður stöðugilda í Fjallabyggð er þriðjungur í stöðugildafjölda bankans í uppsögnum á landsbyggðinni og er mikil blóðtaka fyrir samfélag eins og Fjallabyggð,“ segir ennfremur í fundargerðinni.

Fréttin birtist fyrst í Fréttablaðinu.