Vilja lögbann á framkvæmdir

Íbúar við Vesturgötu og Norðurstíg eru ósáttir við fyrirhugaðar framkvæmdir við svokallaðan Naustareit og ætla að leitast við að fá lögbann á þær. Til stendur að sprengja í klöpp og telja íbúarnir að sprengingarnar muni valda skemmdum í nágrenninu.

Íbúar funduðu á þriðjudag með byggingarfulltrúa Reykjavíkurborgar sem sagði verktakann Mannverk hafi fengið framkvæmdaleyfið. Hann gat ekki veitt svör við því hvort skemmdir geti orðið á nærliggjandi húsum vegna sprenginganna.

Íbúarnir undrast hvers vegna byggingarleyfi er gefið út án þess að þær upplýsingar liggi fyrir. Borgin veitti íbúum þau svör að eigendur og framkvæmdaaðilar beri ábyrgð á því ef skemmdir verða.

Fréttin birtist fyrst í Fréttablaðinu 7. apríl.