Angelo í farbanni þar til dómur fellur

Hollendingurinn Angelo Uijleman, einn ákærðra í umfangsmiklu fíkniefnasmyglmáli sem kom upp í september á síðasta ári, sætir farbanni þar til dómur fellur í málinu.

Hæstiréttur staðfesti í dag úrskurð Héraðsdóms Reykjaness þess efnis. Angelo sætir farbanni eigi lengur en til þriðjudagsins 3. maí.

Sjá einnig: Eignaðist svo góða vini á Kvíabryggju

Greint var frá því í morgun að búið væri að ákæra í málinu, sem vakið hefur mikla athygli. Ekki síst vegna þess að Angelo er greindarskertur en sat í einangrun á Litla-Hrauni í átta vikur. Þá hafði fjölskylda Angelos ekki verið látin vita af handtöku hans fyrst um sinn og móðir hans látið lýsa eftir honum á netinu.

Alls eru fjórir ákærðir í málinu, þar af tveir Íslendingar. Ákæran snýr að skipulagningu fíkniefnainnflutnings og smygli á ríflega tuttugu kílóum af sterkum fíkniefnum.