Leynileg upptaka af húsfundi brot á lögum

Persónuvernd hefur úrskurðað að með því að hljóðrita húsfund án samþykkis fundargesta hafi eigendur tveggja íbúða í fjölbýlishúsi á Íslandi gerst brotlegir við lög. Úrskurður þess efnis var kveðinn upp þann 6. apríl.

Uppi er ágreiningur milli eigenda íbúða í fjölbýlishúsinu vegna lagnaframkvæmda og kostnaðarþátttöku. Af þeim sökum leitaði einn íbúðareigandi til Húseigendafélagsins þar sem honum var greint frá því að nágrannar hans hefðu einnig leitað til félagsins. Ættu þeir upptökur af húsfundi sem báðir aðilar hefðu setið.

Íbúi í húsinu hefði óskað eftir áliti kærunefndar húsamála á ágreiningnum og afhent fundargerð húsfundarins. Þar kom fram að fundargerðin hefði verið skrifuð upp eftir upptöku. Íbúðaeigendurnir sem leituðu til Persónuverndar og kvörtuðu segjast ekki hafa verið meðvitaðir um upptökuna og aldrei hafa gefið leyfi fyrir þeim.

„Þá sé þeim ekki ljóst hvers konar upptökubúnaður hafi verið notaður. Mögulegt sé að upptökurnar séu sundurlausar og klipptar saman,“ segir í úrskurðinum.

Neitaði að staðfesta fundargerðina

Engin fundargerð var rituð á fundinum en var rituð síðar. Var þess óskað að annar kvartendanna staðfesti hana en það neitaði hann að gera þar sem hún hefði verið rituð eftir fundinn og væri að hans mati efnislega röng.

Persónuvernd óskaði eftir viðbrögðum frá þeim sem hljóðrituðu fundinn en fengu engin svör sem sneru að umkvörtunarefninu. Þar sem upplýsingar á hljóðupptökunum voru persónugreinanlegar var málið talið falla undir gildissvið laga um persónuvernd.

Engin lög voru talin réttlæta upptökurnar og var vinnsla upplýsinganna ekki talin sanngjörn þar sem þeir sem voru á fundinum höfðu ekki vitneskju um hana. Upptökurnar hafi ekki samræmst lögum og upplýsa hefði átt fundargesti um upptökuna.

Nánar má lesa um úrskurð Persónuverndar hér.