Landsmenn 332.529 talsins í byrjun árs

Landsmenn voru 332.529 talsins í byrjun árs og hafði fjölgað um 3.429 frá sama tíma árið 2015. Landsmönnum fjölgaði því um eitt prósent milli ára.

Í frétt á vef Hagstofunnar segir að konum og körlum fjölgaði sambærilega á árinu og voru karlar alls 2.011 fleiri en konur.

„Mikil fólksfjölgun var á höfuðborgarsvæðinu, en þar voru íbúar 2.333 fleiri 1. janúar 2016 en ári fyrr. Það jafngildir 1,1% fjölgun íbúa á einu ári. Hlutfallslega varð fólksfjölgunin hins vegar mest á Suðurnesjum þar sem fjölgaði um 2,2% eða 483 frá síðasta ári. Fólki fjölgaði einnig á Suðurlandi, um 445 einstaklinga (1,8%), og um 200 (1,2%) á Vesturlandi. Minni fólksfjölgun var á Norðurland eystra (0,3%). Fólksfækkun var á þremur landsvæðum, á Vestfjörðum þar sem fækkaði um 87 manns (1,2%), á Austurlandi þar sem fækkaði um 44 (0,3%) og á Norðurlandi vestra þar sem fækkaði um tvo (0,1%).

Níu sveitarfélög hafa yfir 5.000 íbúa

Hinn 1. janúar 2016 voru 74 sveitarfélög á landinu sem er óbreyttur fjöldi frá fyrra ári. Sveitarfélögin eru misstór. Alls var íbúatala sex sveitarfélaga undir 100 en undir 1.000 í 41 sveitarfélagi. Einungis níu sveitarfélög höfðu yfir 5.000 íbúa.

Í þéttbýli bjuggu 311.850 manns

Hinn 1. janúar 2016 voru 61 þéttbýlisstaður með 200 íbúa eða fleiri á landinu og hafði þeim fjölgað um einn frá fyrra ári. Auk þeirra voru 35 smærri staðir með 50–199 íbúa sem er fækkun um tvo frá fyrra ári. Í þéttbýli bjuggu 311.850 manns 1. janúar 2016 og hafði þá fjölgað um 3.335 á árinu. Í dreifbýli og smærri byggðakjörnum bjuggu 20.679 manns,“ segir í fréttinni.