Ákærður fyrir að stinga mann með Swiss Army hníf í Austurstræti

Tvítugur karlmaður hefur verið ákærður af héraðssaksóknara fyrir sérstaklega hættulega líkamsárás fyrir utan The Laundromat Café við Austurstræti í Reykjavík að nóttu til haustið 2014. Honum er gefið að sök að hafa kýlt karlmann a.m.k. einu sinni í andlitið og í kjölfarið veist að honum með Swiss Army hnífi.

Hnífurinn var með 5,2 sm löngu blaði og er maðurinn ákærður fyrir að hafa stungið hann vinstra megin í kviðinn með þeim afleiðingum að sá sem fyrir árásinni varð hlaut alvarlega áverka. Þar á meðal stungusár og áverka sem náðu inn í kviðarhol.

Fórnarlambið krefst tveggja milljóna króna í skaðabætur. Málið verður þingfest í Héraðsdómi Reykjavíkur í dag.