Orðið vitni að konum húð­skamma karlana sína fyrir þjófnað í IKEA

Þórarinn Ævarsson, framkvæmdastjóri IKEA á Íslandi, segir að allir geti gert mistök og farið út úr verslun með hluti sem það hafi gleymt að greiða fyrir. Það hafi hent hann sjálfan að átta sig á því að barnið hans hafði tekið lakkrís úr búð sem hann hefði ekki greitt fyrir. Hins vegar séu það þeir sem ætli af fullum ásetningi að stela úr búðinni sem lendi á bannlista hjá IKEA.

Þórarinn ræddi málin í Brennslunni á FM 957 í morgun.

„Ef fólk ætlar sér að stela hjá okkur þá fer það á listann,“ segir Þórarinn. DV greindi frá því í gær að 45 aðilar væru á bannlista hjá húsgagnaframleiðandanum hér á landi vegna þjófnaðar úr búðinni. Þórarinn segir að ekki sé um nytjastuld að ræða, þ.e. að fólk í neyð kaupi rúmföt til að geta búið um barnið sitt eða því um líkt. Hreinlega sé um viðskiptahugmynd að ræða þar sem hlutum sé stolið og reynt að koma aftur í verð.

Skiptu út strikamerkjum

Frægt er þegar par hlaut tveggja mánaða skilorðsbundinn dóm fyrir tveimur árum vegna skipulegs þjófnaðar í fimm verslunarferðum í IKEA í september 2012. Um var að ræða speglaskápa, skatthol og skrifborð sem kostuðu alls um 270 þúsund krónur krónur.

Hafði fólkið tekið strikamerki af mun ódýrari vöru, sett á skápana og þannig greitt mun lægra verð eða samanlagt rúmlega 17 þúsund krónur. Skiluðu þau svo vörunum og fengu inneignarnótu í staðinn.

Þórarinn segir að gögn hafi ekki náð langt aftur í tímann og vel megi vera að umrætt fólk hafi stolið fleiri hlutum. Hann segir IKEA hafa gögn sem staðfesti að þjófnaðurinn hafi numið í kringum sjö til átta milljónir króna.

Konur í meirihluta 

Aðspurður segir Þórarinn erfitt að segja hvort konur eða karlar séu líklegri til að stela úr búðinni. Undanfarið hafi konur verið í miklum meirihluta en þar áður karlar. Um eftirlitið segir hann að öryggisverðir þekki þá sem eru á bannlista í sjón. Ekki sé þó um öflugra eftirlit að ræða en svo að ef menn láta sér vaxa alskegg, setja á sig sólgleraugu eða derhúfu þá gætu þeir farið inn í búðina. 

Stundum hafi þessir menn þó mætt í búðina með konu og barn og verið hent út öfugum.

„Þá höfum við fylgst með því þegar konurnar rífa af þeim rassgatið fyrir framan búðina,“ segir Þórarinn. Það bendi til þess að þær hafi ekki haft hugmynd af þjófnaði maka síns.

Geta komist af listanum

Að sögn Þórarins er engin samvinna á milli landa þegar kemur að bannlistunum. Refsingin sé örugglega harðari til dæmis í Sádí-Arabíu þar sem hendur séu höggnar af þjófum og svo vægari eins og í Svíþjóð. Óumdeilt er að hans mati að þjófnaðurinn endi alltaf í formi hærra vöruverðs. Öryggiseftirlit IKEA, mannskapur og myndavélar, kosti líklega tugi milljóna á ári.

Þórarinn segir vel koma til greina að fjarlægja fólk af listanum. Það hafi sannað sig í tilfelli manns sem gerði sér ferð á skrifstofu IKEA í Garðabæ, baðst afsökunar og greiddi skuld sína. Sá hafði verið í neyslu en var kominn á betri stað í lífinu.

„En svo erum við með aðila sem hafa stolið af okkur í tugum tilfella og við vitum að þeir eru líka að stela í Smáralind og Kringlunni,“ segir Þórarinn. Þessir aðilar eigi ekki afturkvæmt í IKEA að hans mati. 

Hlusta má á viðtalið við Þórarinn í heild sinni hér að neðan.