Eykur vitund barna um umhverfisvernd um leið og reynt er að koma í veg fyrir veggjakrot

„Við erum með þessu að vona að þetta muni koma í veg fyrir veggjakort,“ segir Silja Yraola, nemi í landslagsarkitektar við Landbúnaðarháskólann, en um þessar mundir stendur hún fyrir námskeið fyrir börn sem nefnist náttúra og vegglist.

Námskeiðið er haldið í samvinnu við Bílastæðasjóð en sjóðurinn lánaði hópnum vegg í porti fyrir aftan bílastæðahúsið á Hverfisgötu þar sem börnin mála.

„Markmiðið okkar með þessu verkefni er að stuðla að aukinni vitund barnanna um umhverfisvernd og sjálfbæra þróun. Að þau fylgist vel með nærumhverfinu og hversu viðkvæm náttúran er. Krakkarnir mála síðan verk á stóran vegg og við sjáum að slík verk fá að vera í friði,“ segir Silja.

Hún fór með börnin í rannsóknarleiðangur um náttúruna þar sem börnin rissuðu upp hugmyndir og bjuggu síðan til list úr því. Þá var veggjalist einnig skoðuð í miðborg Reykjavíkur og börnin fengin til að segja skoðun sína á henni.

„Það er ákveðin list á veggjum sem er látin vera. Maður sér alveg smá mun þegar er svona krot sem er bara gert í flýti og leyfisleysi og svo á verki sem er fengið leyfi fyrir og fólk fær tíma til að klára það og gera vel og blandaða við eitthvað koncept.“